Daar’s nooit ’n tekort aan drama in dié Afrikaanse sepies nie.
1
Arendsvlei
Die SAFTA-benoemde Arendsvlei is ’n meesleurende telenovella wat draai om die leerders, hul ouers, en die onderwysers van die Hoërskool Arendsvlei. Dit speel af op die Kaapse Vlakte en is ’n blik op die wêreld van tieners met storielyne wat wissel van groepsdruk, seks en dwelms, tot druk om te presteer, in te pas, maar ook om getrou aan hulself te bly. Dan is daar natuurlik ook die volwasse garde se sagas – ’n bietjie moord hier, ’n affair of wat daar – en saam is dié kombinasie uiters boeiende kykstof. Die rolverdeling sluit in veteraan-sepiester Ilse Klink (Nêrens, Noord-Kaap), Carmen Maarman (Lui maar op, Belinda) en Jolene Martin (Fishy Fêshuns).
2
Suidooster
Suidooster draai om die mense van ’n klein winkel- en sakesentrum in Ruiterbosch, ’n fiktiewe Kaapse voorstad waar verskillende gesinne in mekaar se lief en leed deel. Die Octobers, die Samsodiens en die Du Plooys is al in mekaar se besigheid in, en daar is nooit ’n tekort aan skinner en spektakel nie. Die lot het onlangs nuwe bure in die buurt gekry – Esther von Waltsleben en Natasha van Der Merwe vertolk Elana en Susan, Suidooster se eerste getroude gay paartjie. Die sepie het in 2015 met net drie episodes ’n week begin, maar sedert 2017 word daar nuwe episodes van Maandag tot Vrydag uitgesaai.
3
Binnelanders
Vir 16 jaar reeds verober sepievrate die hoogdrama wat in die Binneland-kliniek afspeel. Dié sepie het begin as ’n uur lange mediese drama, Binneland, op M-Net en kykNET, maar nie lank later nie is die formaat na ’n halfuur lange weeksdag-drama verander. Intussen is, soos ’n ordentlike sepie betaam, verskeie karakters by die hospitaaldeure in en uit – heelwat van ons land se top-talent het op dié stel dokter-dokter gespeel en die sepie se nuutste gesig is Roeline Danéél (Fynskrif, Arendsvlei). Die reeks fokus op die wel en weë van die kliniek se personeel en pasiënte, maar met die hoeveelheid drama wat in die lewens van die karakters afspeel – van verlief raak op pasiënte, tot die afweer van industriële spioenasie – is dit besonders dat daar ooit tyd is om enige werk gedoen te kry!
Kyk dit op Showmax, kykNET op DStv en DStv Catch Up.
4
Getroud met Rugby
Rugby is big business in die regte wêreld én in showbiz – maar in Getroud met Rugby gaan dit oor veel meer as 80 minute se lynstane en losgemale op die veld. Getroud met Rugby is soos Binnelanders deur ’n paar gedaantewisselings – aanvanklik was dit ‘n weeklikse drama-reeks, maar deesdae speel dit as ’n sepie op weeksaande af. Met ’n rolverdeling wat vir onder andere Stephanie Baartman, Christel van den Bergh en Altus Theart insluit, draai die storie om die intriges, skandale, huwelike, seksuele verhoudings, rugbypolitiek en verraad wat van die veld af ontvou.
Kyk dit op kykNET op DStv, DStv Catch Up en Showmax.
Die oorspronklike dramareeks se 63 episodes is ook op Showmax beskikbaar.
5
Egoli: Plek van Goud
In 1992 het Suid-Afrika se eerste tweetalige (Engels/Afrikaans) sepie sy debuut op M-Net gemaak. En in oopkyktyd nogal. Gratis en verniet, al het jy nie M-Net gehad nie. Dalk daarom die aanvanklike gewildheid, hoewel skepper Franz Marx se Bold & the Beautiful-esque karakters later amperse huisgaste geword het. Daar was Gé Korsten se Walt Vorster, die patriarg van die Vorster-familie, Chantel Stander as Joanne (en later sommer ook as Joanne se tweelingsuster Kimberley), David Vlok as slinkse Tim, Tiffany Kelly se moenie-met-my-mors-nie-Sonet, Shaleen Surtie-Richards as Marlboro Mansions se woelige opsigter, Nenna, en ’n lang lys ander akteurs wat oor die loop van 18 jaar stories van kullery, etlike affairs, troues en egskeidings en nog troues, kultusse en ’n boef by name van Spider (Wilson Dunster), vertel het.
Kyk dit op Showmax.
