Hier’s hoekom jy liefs nie ’n enkele Diepe Waters-episode hierdie maand moet mis nie:
1
Kykers was in Augustus geskok toe Gys en Zelda uiteindelik hul liefde aan mekaar tydens ’n lewensgevaarlike situasie verklaar het. Die twee is verlief, maar nie almal is ewe bly vir hulle nie. Dis te verstane met hul geskiedenis, maar gaan hierdie persoon uiteindelik ’n wig tussen hulle dryf?
2
Karla se hart was stukkend toe sy uitvind dat Chris nooit dieselfde oor haar sal voel nie. Maar saam met die geur van lente in die lug, is daar skoenlappers in haar maag as Nelius se kleinseun by die swemklub aansluit.
3
Karla is nie die enigste een wat skoenlappers voel nie – Tommie het die skoot ook hoog deur, en nogal met ’n meisie met die naam Tomi! Daar is net een probleem – Tomi het reeds ’n kêrel…
4
Dit het geblyk asof Ben en Sanet se verhouding uiteindelik weer op koers is ná die hele Leticia-petalje. Maar dan bars daar ’n bom met ’n aankondiging van Ben af. Dit laat Sanet voor ’n kruispad, en sy weet nie watter kant toe nie.
5
Terselfdertyd sukkel Wim om die huis te verkoop, en worstel hy binne homself. Dit alles terwyl Rose reeds haar lewe in die Kaap begin het. Gaan Wim saam met Rose van voor af in die Kaap kan begin? Of is daar iets (of iemand) wat hom van plan sal laat verander?
6
Soms kan die keuses wat jy maak jou duur te staan kom. Hoe fataal gaan ’n Diepe Waters-karakter se keuse in September wees?
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
