5 goed wat jy van ‘Spoorloos: Losprys’ moet weet

Spoorloos se vyfde seisoen, Spoorloos: Losprys, is soos die vorige aflewerings van dié reeks ’n losstaande spanningsverhaal. Die vorige seisoene van die reeks is op Showmax beskikbaar.

Dié uittog handel oor ’n ryk wildboer, Brand (Louis Minnaar), wie se tiener-kleindogter, Karla (Lienke Vermeulen), ontvoer word tydens haar pa, Willem (Neels Clasen), se moordverhoor. Sy is ’n sleutelgetuie in die saak. Haar ma, Lynette (Angelique Pretorius), word genoodsaak om haar eks-minnaar, Frank (Laudo Liebenberg), om hulp te vra, synde hy die enigste ervare speurder in die distrik is. Maar sodra die saak opgelos word, verdwyn nog iemand spoorloos – en hierdie keer word geen losprys geëis of leidrade verskaf nie… 

Hier is vyf goed wat jy oor die nuwe seisoen moet weet: 

Losprys is die vyfde seisoen in die Spoorloos-reeks. Die eerste een was net Spoorloos getitel en is in 2018 uitgesaai. Daarna het Spoorloos: Heksejag  (2020), Spoorloos: Steynhof (2021) en Spoorloos: Die eiland (2022) gevolg. 

Hierdie is die eerste keer in tien jaar wat Angelique Pretorius, bekend vir haar werk in Binnelanders, Hartland en Lien se lankstaanskoene, weer in ’n Afrikaanse reeks speel. Die Amerikaanse rolprent Mind Thief (2022) waarin sy die hoofrol gespeel het en die medeskrywer van was, het verskeie toekennings gewen, onder meer vir beste rolprent en beste draaiboek by die Boston Science Fiction Film Festival. Dit het ook gewen vir beste rolprent en beste aktrise by Film Invasion L.A., en beste rolprent by die Los Angeles Film Awards. 

Dis nie die eerste keer wat Angelique Pretorius en Laudo Liebenberg saam aan ’n reeks werk nie. Hulle het ook saam in die Amerikaanse TV-reeks Black Sails gespeel wat buite Kaapstad verfilm is. 

Die akteur Deon Coetzee speel vir die derde keer in Spoorloos. Hy was Werner Malan in die eerste seisoen en Freek Lambrecht in Spoorloos: Die eiland. 

Die skrywer van Spoorloos: Losprys is Mitzi Booysen. Sy het haar loopbaan as aktrise begin, maar in die vroeë 1990’s ’n draaiboekskrywer vir Egoli geword. Sy was die hoofskrywer van Binnelanders en het ’n allemintige 3 906 episodes op haar kerfstok. Mitzi was ook betrokke by die sepies Isidingo en Scandal! en die dramareeks Lioness. 

Spoorloos: Losprys is van Dinsdag 26 Augustus om 20:00 op kykNET (DStv-kanaal 144) en sal ook op DStv Stream en Catch Up beskikbaar wees. Die vorige vier seisoene van Spoorloos is op Showmax beskikbaar.