Oraait, dié reeks is effe cringe. MAAR (en dis ’n belangrike maar . . .) cringe is soms wat jy nodig het op jou kyklys. Veral as jy net iets breinloos wil kyk wat jou dalk-dalk selfs ’n traan of twee sal laat stort.
The Summer I Turned Pretty is daai tipe reeks wat dit sélf ongelooflik ernstig opneem. Dít is tog ’n tienerdrama en is dit maar nie wat tieners doen nie? Dit is in wese ’n romantiese tienerdramareeks en deur die skrywer Jenny Han vir Amazon Prime geskep. Han is bekend vir haar To All the Boys I’ve Loved Before-boekreeks wat in flieks op Netflix omskep is.
Die eerste seisoen van The Summer I Turned Pretty het afgeskop af met ’n tipiese vakansietema met’n onskuldige saamkuiery by vriende se strandhuis wat weldra tot groot drama, hartseer en onsekerheid lei.
Isabel ‘Belly’ Conklin (Lola Tung), wat as een van die talentvolste nuwelinge in die bedryf beskryf word, word in die tweede seisoen herenig met haar oorbeskermende broer, Steven (Sean Kaufman) en hul twee vriende, die broers Jeremiah (Gavin Casalegno, Vampire Diaries) en Conrad Fisher (Christopher Briney, Daliland).
Aan die einde van die eerste seisoen is Belly se hoop op wederkerige liefde verpletter as Conrad haar nie in dieselfde lig beskou nie. Sy het ook besef dat Conrad baie verander het sedert hulle mekaar laas gesien het. Dan raak sy met Jeremiah deurmekaar…
In die tweede seisoen voel die sestienjarige Belly vasgekeer tussen Conrad en Jeremiah, wat albei om haar hart meeding. Dít terwyl hul ma, Susannah (Rachel Blanchard van Clueless-faam), ’n moeilike stryd teen kanker veg.
Somer by die vakansiehuis in Cousins Beach voel dus wildvreemd; glad nie soos die vorige somers waarna sy so uitgesien het nie.
Maar as ’n onverwagte besoeker die toekoms van die vakansiehuis – Susannah se gunsteling-plek op aarde – bedreig, maak Belly werk daarvan om al die vriende saam te trek om ’n oplossing te vind. Sy sal egter ook eens en vir altyd moet besluit by watter van die twee Fisher-broers haar hart lê . . .
Die reeks raak ook belangrike en diep temas aan; daar sal noodwendig jonger kykers wees wat hierby kan aanklank vind. Dalk help dit hulle om nie so alleen te voel nie. Of dalk por dit hulle aan om met ’n eerlike en oop gemoed die lewe aan te pak. So smart-agtig as wat dié storielyn is, is daar dus wel positiewe te vinde.
Kyk die tweede seisoen van The Summer I Turned Pretty vanaf Vrydag, 14 Julie 2023, op Prime Video. Die eerste seisoen is ook op Prime Video beskikbaar.
