Die dokkiereeks Surf Girls Hawai’i volg ’n nuwe generasie van inheemse vroue-branderplankryers in Hawai’i soos hulle meeding vir gesogte plekke op ’n wêreldtoer.
Die fokus is op vyf van die sport se nuwelinge – Moana Jones Wong (24), Ewe Wong (18), Maluhia Kinimaka (27), Pua DeSoto (17) en Brianna Cope (28).
Die beperkte reeks – bestaande uit vier dele – volg dié vyftal soos hulle oefen, persoonlike uitdagings takel en teen die beste surfers in die wêreld meeding om die beste brander te vang. Die see, kan ’n mens maar toegee, is eintlik ook een van die dokkiereeks se hoofkarakters, en die kamerawerk is deurgaans meesleurend.
Surf Girls Hawai’i is uit Reese Witherspoon se Hello Sunshine-stal. Kritici meen dat die reeks goed doen om die branderplankry as ’n kulturele gebruik of praktyk in Hawaii te vestig.
Decider skryf hieroor: “Surf Girls Hawai’i bied persoonlike profiele en inspirerende stories in gelyke dele, soos die dokumentêre reeks die vyf jong vroue volg wat sentraal tot die storie staan. Elkeen van hulle is net so trots op hul Hawaiiaanse erfenis as op hul bekwaamheid daar buite op ‘n branderplank in die Pyplyn.”
Vanaf Dinsdag, 18 Julie 2023, op Prime Video.
