Kyk uit vir dié vyf storielynkinkels in Suidooster in Julie.
1
Dit begin lyk of Ruiterbosch die nuwe Wilde Weste is met Texas en Nazeem se gekonkel want by die nuwe Lone Star-wassery word daar veel meer as net klere gewas! Dit inderwaarheid ’n front vir ’n onwettige casino en verskeie van Ruiterbosch se inwoners geniet nogal dié nuwe tydverdryf. Maar Texas en Nazeem moet hul voetwerk ken om die regte kliënte te lok en terselfdertyd diegene wat hul pret kan bederf, van stryk te bring. Gaan die twee slinkse manne kan keer dat hul vuil wasgoed in die openbaar gewas word?
2
Cupido kom klop ook dié winter aan Aiden se deur. Ja, Ruiterbosch se apteker raak halsoorkop verlief op die pragtige Lisa. Hy glo vas sy is sy trouvrou, maar is sy werklik die regte medisyne vir hom?
3
Nou dat Zoë finaal die “Tim-hoofstuk” afgesluit het, sien sy kans om weer die opsitkers aan te steek. Só begin Gary by haar vlerksleep en sy vang ook Texas se oog. Maar Zoë se visier is moontlik op iemand anders ingestel. Kan dit ’n kwessie wees van ou liefde wat nooit roes nie?
4
Die ring wat Siya en Kate in die kollektesakkie gevind het, is dalk manna uit die hemel vir die kerk. Terwyl hulle probeer om agter die kap van die byl te kom, veroorsaak dit ook spanning tussen hulle.
5
Die Samsodien-gesin kom voor nog ’n groot toets te staan. Die keer is dit Mymoena wat in die versoeking gelei word en sy neem ’n paar skokkende besluite.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
