Die nuwe apteker wat pas ingeval het by Aalwyn Apteek in Ruiterbosch, die fiktiewe Kaapse woonbuurt die kykNET-sepie Suidooster afspeel, is beslis nie ’n poppie wat sonder handskoene aangevat moet word nie… Dit word gou duidelik dat daar veel meer aan Ava Philips (Simone Neethling) is as wat ’n mens op die eerste oogopslag sou dink.
Sy’s mooi, selfversekerd, slim en boonop geheimsinnig . . . En Ava trek aandag waar sy ook al gaan. Selfs die uitgeslape Nazeem Jacobs (Irvine van der Merwe) kan nie sy oë van haar af hou nie.
Meer oor Simone
Vir Simone, wat al in produksies soos die kykNET & kie-telenovela Arendsvlei en die kykNET-drama Een keer om die son te sien was, het haar rol in Suidooster vir haar ’n opwindende nuwe deur oopgemaak.
Hierdie is haar eerste groot sepie-rol en volgens haar ook haar eerste behoorlike volwasse rol. “Vir die grootste gedeelte van my loopbaan het ek karakters gespeel wat in die ouderdomsgroep van sowat 16 tot 22 val. Ek is nou gereed vir die bedryf om my in ’n meer volwasse lig te sien,” sê Simone.
Sy beskryf haar tyd op Suidooster as ’n ongelooflike ervaring en sê dit was “’n vreugde” om vir meer as twee maande elke dag werk toe te kon gaan. “Ek is baie opgewonde oor wat hierdie rol vir my beteken, en ek is opgewonde oor wat in die toekoms vir my voorlê,” sê sy.
Hoe sou jy Ava vir kykers beskryf?
“Ek sou sê Ava is nogal geheimsinnig. Die woord “enigmaties” word baie gebruik wanneer mense oor haar praat. Daar is beslis meer aan haar as wat ’n mens op die oog af sien.
“Dit lyk asof sy soort van ’n dubbele lewe lei, maar in wese is daar eenvoudig soveel meer aan Ava as wat mense aanvanklik raaksien.”
Ava is beeldskoon, vurig, selfversekerd en iemand wat aandag afdwing. Wat het jou die meeste opgewonde gemaak om in haar skoene te klim?
“Ek wou nog altyd ’n sterk vroulike karakter speel en Ava is presies dit vir my. Sy is uiters onafhanklik. Sy maak dit baie duidelik dat sy nie ’n man nodig het nie. Sy verwelkom dalk die geselskap van een, maar sy het nie een nodig om te oorleef of gelukkig te wees nie.
“Sy is ook ongelooflik slim. Vir Ava is alles in die lewe ’n spel. Dit beteken sy dink altyd vooruit, amper soos in ’n skaakspel. Sy is altyd twee treë voor, en wanneer sy nie is nie, vind sy op die een of ander vernuftige manier ’n skuiwergat om weer voor te kom.”
Hoe was die ervaring om in die sepie-genre te werk in vergelyking met jou vorige ervaring, insluitend Een keer om die son?
“Ek het hierdie ervaring ongelooflik baie geniet. Ek dink eerlikwaar dit was een van die mees bevredigende, maar ook uitdagendste rolle wat ek nog gehad het sedert ek in die bedryf begin het. Met Suidooster skiet ons ’n episode per dag, so dinge beweeg baie vinnig. Die manier waarop my brein werk en die manier waarop die Suidooster-masjien werk, het net vir my sin gemaak. Alles het sy plek, en omdat dinge so vinnig beweeg, is daar nie tyd om in jou kop vas te haak of dinge te oordink nie.
“Ek dink nie enigiets anders kan regtig met Suidooster vergelyk nie – dis so ’n unieke masjien. Ek het nog nooit voorheen met multi-kamera gewerk of ’n sepie geskiet nie. Hierdie was ’n groot skuif en aanpassing vir my. Maar ek voel ek het redelik vinnig ingeskakel en my pad gevind.
“Dis moeilik om Suidooster met vorige produksies, soos Een keer om die son, te vergelyk. ’n Reeks word normaalweg baie anders geskiet. Jy werk by tye net met ’n enkel- of dubbelkamera-opstelling en tonele kan langer neem om op te stel.
“Met Suidooster is daar steeds ’n sterk fokus op die toneel en die spel, maar dit is tegnies ook baie presies. Jy moet jou merk tref. In ’n reeks is dit natuurlik ook belangrik, maar in ’n sepie-omgewing is dit ’n bietjie strenger weens die tempo en die tegniese opstelling.”
Ava word vinnig deel van die Ruiterbosch-gemeenskap. Wat dink jy maak haar so goed daarmee om mense oor te wen?
“Ava het ’n baie goeie hart. Ek dink ook omdat sy in die mediese beroep werk, weet sy hoe om met mense te kommunikeer. Terselfdertyd is alles in die lewe is vir haar ’n spel. Soms gaan dit vir haar daaroor om die waters te toets om te sien hoe ver sy ’n persoon of situasie kan druk om te kry wat sy wil hê.
“Sy weet ook hoe om mense te lees en sy kan vinnig optel waarin iemand belangstel – en dit dan tot haar voordeel aanwend, wat ook al haar doelwit is.”
Daar is duidelik meer aan Ava as wat ’n mens op die oog af sien. Hoe lekker is dit om ’n karakter te speel wat op die oppervlak sjarmant is, maar soveel geheime verdoesel?
“Dit was ongelooflik om ’n karakter te vertolk wat soort van ’n tipe dubbele lewe lei – iemand wie se “buitekant” jy dalk sien, maar dis nie noodwendig dieselfde wat jy aan die “binnekant” kry nie.
“Dit was baie lekker om die verskillende weergawes van Ava te speel. As akteur moes ek al die fasette versinnebeeld van wie sy is. Dit was nie net ’n geval van ’n laboratoriumjas aantrek en skielik word jy ’n sekere tipe mens nie.
“Dit het gegaan daaroor om twee weergawes van Ava volledig te ontwikkel: die harder uiterlike weergawe wat weet wat sy wil hê en hoe om dit te kry, en die meisie-van-langsaan-weergawe wat werklik ’n goeie hart het. Daardie meer sorgsame kant van haar kom tog na vore, afhangend van met wie sy praat.
“Dit was uitdagend, maar baie interessant om te speel.”
Ava vang Nazeem Jacobs se oog, en hul konneksie word ’n belangrike deel van haar storielyn. Wat kan kykers van hul verhouding verwag?
” ’n Volledige wipwarit. Omdat hulle by ’n pokerspel ontmoet, voel dit amper asof elke interaksie tussen hulle ook op ’n pokerspel geskoei is. Die een bluf dalk, terwyl die ander een besluit om al die kaarte op die tafel neer te sit. In ’n stadium gaan altwee tog wel all in.
“Daar is ’n tit-for-tat-dinamiek tussen hulle, maar daar is ook opregte liefde. Ek dink dit is fasinerend om te sien hoe hul verhouding begin uitspeel.”
Ava se morele kompas kan as grys beskryf word, veral wanneer dit kom by die beskerming van die mense vir wie sy omgee. Sien jy haar as gevaarlik, misverstaan, of ’n bietjie van albei?
“Sy is beslis ’n bietjie van albei. Sy word misverstaan weens haar gevaarlikheid, maar daardie gevaarlikheid spruit voort uit haar begeerte om te doen wat reg is. Dit werk net nie altyd uit soos sy dink dit sal nie.
“Omdat sy so slim is, maak sommige van die oplossings waarmee sy vorendag kom, wel sin. Maar dit is nie altyd die veiligste opsies nie.
“Sy lei ook dikwels met haar hart, en hartsake kan soms logika en veiligheid verblind. Ek sou dus nie sê sy is doelbewus gevaarlik nie. Ek sou sê sy is kragtig, en sy het ’n kragtige verstand. Haar hart word beslis misverstaan, en daarin kan die gevaarliker kant van haar na vore kom.”
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up en DStv Stream.
