Die besonderse dramareeks Een keer om die son, wat onder die leiding van akteurs en storieskeppers Ivan Botha en Donnalee Roberts vervaardig is, se tweede seisoen saai vanaf Dinsdag 20 Januarie om 20:00 op kykNET uit.
As jy die eerste seisoen misgeloop het, kan jy hier op Showmax opvang, want daar is ’n hele rits goeie redes om vir die tweede seisoen voor ’n skerm in te skuif.
1
Wen-bestanddele
Dié reeks was ’n reusetreffer met die eerste seisoen se bekendstelling in 2024. Die tweede seisoen beloof nog meer emosie en intrige, met oomblikke van humor wat die donker in balans hou – soos ook in ons werklike dag in en dag uit gebeur. Die hoofrolspelers is ook almal terug in hul onderskeie rolle. Jacques Bessenger is dr. Ruan van Wyk, en sy kinders word gespeel deur Liam Bosman (Markus), Alma van Heerden (Leandri) en Klara van Zyl (Sophia). Jana Kruger (Lani), wie se dood Ruan en die kinders steeds verwerk, is weer in terugflitse te sien. Amé (Donnalee Roberts), Ruan se jonger suster, se huwelik het in die eerste seisoen in die hek geduik. Albert Maritz is te sien as Sebastian, ’n afgetrede professor in insektekunde, en Joanie Combrink is Elma, die Van Wyks se matriarg wat in die eerste seisoen met Alzheimer se siekte gediagnoseer is.
2
Storielyne wat raakvat
Die karakters kom oor die loop van die seisoen se 13 episodes voor etlike uitdagings te staan. Maar wat die vertellings van verslawing, tweede kanse, lewensveranderende gesondheidsprobleme, ontkenning, rou en meer onderskraag, is elke liewe karakter se soeke na verbintenis en aanvaarding, hetsy as deel van hul gesin of in die breë.
3
Vonke wat spat
Een van die tweede seisoen se nuwe karakters is Erika du Randt, vertolk deur die bekroonde Binnelanders– en Koek-aktrise, Cindy Swanepoel. Erika is ’n maatskaplike werker en ongelooflik toegewyd aan haar rol. Haar paaie kruis in die eerste episode van die nuwe seisoen met Ruan en een hysbak-krisis later is hul chemie reeds tasbaar. Maar hoe gemaak met kleine Sophia wat vas oortuig is haar pa sal nooit van haar ma aanbeweeg nie?
4
Amé se hart, integriteit op die spel
Charl Boshoff (Ivan Botha), Amé se kollega en liefdesbelangstelling, speel ’n groter rol in die tweede seisoen… Maar daar is ’n paar rooi vlae wat begin wapper wat sy gedrag betref. Veral as ’n joernalis begin vrae vra oor moontlike bedrog by die maatskappy waarvoor Amé werk.
5
Ontmoetings
Die jong akteur Heinrich Wentzel, bekend vir sy rolle in Niggies en Die nuusmakers, speel Elijah Smith. Elijah en Leandri ontmoet op ’n ongewone manier.
6
Heerlike gasspeler
In die eerste episode van die tweede seisoen is Mandri Sutherland te sien as Niggie, ’n vrou op soek na liefde. Net dalk ’n bietjie te hard op soek… Nietemin, Mandri se rol is klein, maar dis ’n heerlike stukkie komiese televisie.
7
Gedugte span byspelers
Dan is daar ook nog die gereelde byspelers – waarlik ’n gedugte span. Onder die karakters wat terugkeer, tel Sebastian en Elma se goeie vriende Salie en Jan Wessels (Susanne Beyers en Pierre van Pletzen), Markus se dansmaat en meisie, Charlie (Simone Neethling), Leandri se kêrel, Xavier (Alex van Dyk), en Lani se pa, Trevor de Kock (Deon Lotz). Die verpleegsuster Karen (Isadora Verwey) en Sophia se maatjie Dougie (Johannes Jordaan) kry ook lekker lugtyd in.
Die tweede seisoen van Een keer om die son begin op Dinsdag 20 Januarie om 20:00 op kykNET en DStv Stream (DStv-kanaal 144) uitsaai. Episodes sal ook ná uitsending op Catch Up beskikbaar wees. Kyk ook die eerste seisoen op Showmax.
