Silwerskerm-wenner Rolanda Marais (Trackers, Poppie Nongena) vertolk die hoofrol in die rillerreeks, Slot, as ’n briljante, gesiene psigiater wat ’n dwelm ontwikkel om pasiënte se onderbewussyn binne te dring. Die doel? Om sodoende “toegang” tot hul onderliggende trauma te kry en genesing te vind. Die dwelm is egter onwettig en wend sy haar tot geheime wegbreek-terapiesessies om dit toe te dien. Sy kon egter nie voorspel hoe ’n vier dae lange wegbreek haar lewe, asook die lewens van haar drie pasiënte, onherroeplik sou verander nie.
“Slot is ‘n opwindende riller,” sê SAFTA-bekroonde regisseur Jozua Malherbe (Griekwastad). “Die reeks van vyf episodes maak uiteindelik ’n vollengte film van 125 minute uit – elke episode maak deel uit van ‘n groter verhaal – ’n legkaart wat kykers uiteindelik bymekaar kan pas.”
Die rolverdeling sluit in Brendon Daniels (Showmax Original-reeks Skemerdans), Albert Pretorius (Die Seemeeu) en Trudy van Rooy (Die Byl).
Kyk die reeks op Showmax.
