Hier is waarna jy hierdie week (9 tot 13 Desember) op Suidooster, Diepe Waters en Skemergrond kan uitsien.
Suidooster
Verlede week se groot vraag was… wie pla vir Riaan (Niël Coetzee) al die pad van Australië af? Wel, die raaisel word opgelos! Hoewel ek gewoonlik kan raai wat volgende in ons sepies gaan gebeur, is hierdie next level. As ek Bianca (Simone Biscombe) is, hol ek vir die berge, want ken ons ooit vir Riaan ná hierdie onthulling? En wat gaan Kate (Annelisa Weiland) sê, want dit lyk ook nie asof sy weet nie!
Net toe almal dink dat Nazeem (Irvine van der Merwe) vir Kaashifa (Jawaahier Petersen) in ’n hoek gedruk het, wys sy vir hom (en ons) dat jy nooit tussen ’n vrou en haar baba moet kom nie. Maar ek sal maar wag voordat ek vir haar geluk sê, want ons almal weet hy gaan wraak neem. Hierdie een het hom te veel verneder. Dit is hoekom ek hom nooit sal vertrou nie.
So gepraat van verneder, ek het altyd gedink Aiden (Theodore Jantjies) is ’n ordentlike mannetjie, maar ek begin nou sterk twyfel, want die bewyse teen hom is net té verdoemend. Wie het dan nou gedink Aiden gaan só uitdraai? Of dalk is ek en Elana (Esther von Waltsleben) weer te vinnig met ons judgement, ons kyk maar!
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up, DStv Stream en Showmax.
Diepe Waters
Rossouw (Altus Theart) is beslis ’n beter mens as ek, want ek vergewe en vergeet nie so maklik nie. Ek staan bankvas agter Anja (Reandi Grey) met hierdie een, want Sanet (Nadia Valvekens) begin my nou ook omkrap. Vir iemand wat so gereeld met gemors sit, maak sy nie die beste besluite nie. Hoekom nou vir Candy (Christia Visser) ’n koningslewe aanbied? Ek verstaan dit nie en Rossouw val ook soos gewoonlik vir die flous. Die vroue smokkel darem maklik met sy kop.
En daar vind ons toe verlede week uit dat René (Marijke Coetser) se seun ’n Bester is, what a shocker! Gys gaan niks hiervan hou nie! Maar ek sou ook so paniekbevange soos René wees ná die onverwagse ontmoeting hierdie week. Hoe gaan sy seker maak dat pa en seun nie in dieselfde vertrek is nie? Boskruin is te klein om dit te vermy!
Maar Jacques (Werner Coetser) het groter probleme as René! Hy het gedink hy doen iets goeds en nou is ek bang dat hy een van die dae die liefde van sy lewe in die tronk gaan moet besoek. Hier kom Boskruin se eie weergawe van #loveafterlockup. Hoor wat ek sê… PSTD kan jou snaakse dinge laat aanvang!
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Skemergrond
Jasmine (Khadija Heeger) is die duiwel in vir JP (Charlton George) die week en as julle uitvind hoekom, sal julle onmiddellik verstaan. Ek het empatie met JP, maar ek sou ook soos Jasmine gereageer het. Hierdie tipe geheim is iets wat verhoudings opbreek. JP se gesig toe Jasmine die ander nuus met hom deel was priceless. Nou wag ek in spanning om te sien hoe Christine (Devonecia Swartz) haarself uit hierdie situasie gaan kry met haar kreatiewe leuens.
Hazel (Carmen Maarman) weet net nie wat op haar wag nie en ek kry haar so jammer. Ek wil glad nie vir Christine as ’n sussie hê nie, dan vat ek maar eerder my kanse met loskop Lily (Hildegardt Whites).
Ons leer ken Tillie (Deirdre Wolhuter) ’n bietjie beter hierdie week en ek moet erken dit maak my nogal hartseer. Sy verdien nie wat met haar gebeur nie. Maar iets sê vir my ons gaan binnekort haar seun Dirk (Wilhelm van der Walt) ontmoet, want iemand moet vir Willem (Deon Lotz) keer.
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
