Ons sepievoorskou vertel jou meer oor waarna jy hierdie week (23 tot 27 Junie) in Skemergrond, Diepe Waters en Suidooster kan uitsien.
Skemergrond
’n Mens sou dink dat Christine (Devonecia Swartz) teen dié tyd die handdoek sou ingooi, veral ná verlede week se bekgeveg tussen haar en Erica (Shimmy Isaacs). Ongelukkig kan Christine nou net nie die vertrek lees nie en is dit hierdie week Lily (Hildegardt Whites) se beurt om haar op haar plek te sit. En WOW, wat ’n toneel! Ek belowe kykers gaan seker net so hard vir Lily cheer soos wat ek gedoen het. Uiteindelik het iemand die guts om vir Christine te sê wat ons almal al lankal dink.
Hildegardt kan beslis in my boekies ’n Emmy-benoeming kry vir daardie monoloog. Iemand wat sê woorde maak nie seer nie, het definitief nog nie só ’n speech gekry nie. Ouch! Die beste drie minute van die week in my opinie! En al lyk dit asof Christine nie ’n hart het nie, weet ons dié week sy het wel nadat Lily se woorde haar so hard tref dat sy… Julle sal maar moet inskakel! Dalk is dít hoe die Louws hul plaas red?
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
Diepe Waters
Die skurke is weer orals besig die week! Om nie met Zelda (Sandi Schultz) te trou nie, was die grootste fout van Gys (Justine Strydom) se lewe. As hy dan nou regtig so kwaad was oor die verlede, sou ek maar my trots sluk en juis met haar trou – keep your friends close and your enemies closer! Hierdie keer lyk dit regtig nie asof Gys se reputasie hierdie nuwe aanval gaan oorleef nie. Dat almal nog wonder wie agter alles sit, gaan my verstand te bowe. Neem Zelda hierdie week dinge te ver? Of is dit Gys se verdiende loon omdat hy haar hart so erg verpletter het? Dit sal kykers maar self moet besluit.
Maar Gys is nie die enigste een wat met een oog moet wakker slaap nie! Teresa (Mandi du Plooy-Baard) kry ’n kuiergas hierdie week en sy laat die hare op my arms regop staan. Al wat ek gaan sê is dat die appel nie ver van die boom val nie…
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Suidooster
Bridgette (Denise Newman) moet vrede maak met die gevolge van verlede week se aksies. Wie het nou hierdie sien kom, want dit was beslis nie op my 2025 bingo-kaartjie nie. Só verander jou lewe in ’n oogwink. Maar wat beteken dit vir die res van die Jacobs-familie en die toekoms van JPD? Dit is die groot geveg hierdie week. Maar die naskokke van verlede week se ontploffing is amper net so erg! Dié geheim was so diep weggesteek, ek het al daarvan vergeet! Maar dit wys jou net jy moet nooit dink iets het sommer net verdwyn in sepieland nie.
Ten minste lyk dit asof die Samsodiens vir ’n slag in vrede gaan lewe, veral nou dat Kaashifa (Jawaahier Petersen) en Rhafiek (Irshaad Ally) weer in dieselfde vertrek kan wees. Hoekom voel dit vir my asof Dullah dalk sy happy family gaan kry?
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up, DStv Stream en Showmax.
