Ons het die inside scoop oor die grootste storielyne in Binnelanders, Diepe Waters en Suidooster hierdie week. Moenie worry nie, dié sepievoorskou is spoiler free!
Binnelanders
Tracy (Melinda Brink) sukkel om Tertius (Reynardt Hugo) te vergewe, veral omdat sy nie net aan haarself moet dink nie. Sy moet vinnig besluit of sy haar groot nuus met Tertius gaan deel of nie, maar sy wil hom nie van Australië terughou nie. Intussen raak dinge baie ongemaklik en gespanne met Daleen (Desiré Gardner) wat nog in die huis is. Sy hoop egter dat Tertius wel saam met haar en Nina op die vliegtuig sal klim.
Delia (Odelle de Wet) en Steve (Clint Brink) is bekommerd oor Conrad (Hykie Berg) se toestand en soek na sy lewende testament. At (Hans Strydom) wil egter niks hoor nie en glo Conrad gaan ten volle herstel nadat hy byna verdrink het. Nicolette (Kate Roothman) weet nie wat om met haar emosies te maak nie, maar haar besorgdheid oor Conrad kry wel vir haar baie punte in At se boekies.
Louis (Germandt Geldenhuys) en Naomi (Je-ani Swiegelaar) sit steeds nie langs dieselfde vuur nie. Hulle verskil deesdae oor alles en Naomi maak ’n paar besluite wat haar loopbaan – en huwelik – op die spel plaas.
’n Nuwe pasiënt het almal in Binneland op hol, maar veral vir Karen (Luandri Reynders) wat nie kan wegbly nie. Talk about a sucker for punishment!
Binnelanders saai op weeksdae om 19:30 op kykNET (DStv-kanaal 144, ook aanlyn) uit. Episodes is ook ná uitsending op Catch Up beskikbaar.
Diepe Waters
Dit is die week van die matriekafskeid vir Karla (Daniélle Swanepoel) en Nina (Reze-Tiana Wessels)! Rose (Eloise Cupido) reël ’n spesiale spa-dag vir haar, Sanet (Nadia Valvekens) en hul dogters. Praat van awkward! Wie wil dan nou besties wees met jou skelmpie se vrou? Sanet probeer haar beste vir die kinders se onthalwe en neem ook ’n groot stap in haar lewe.
Lyk my geluk is nie vir Pam (Tracey-Lee Olivier) beskore nie… Nog ’n geheim word dié week onthul en ongelukkig gaan dit wéér ’n invloed op Pam se toekoms hê. Nes Pam, word Meghan (Lea Vivier) se lewe ook omgedolwe. Die arme kind weet nie meer wie of waar sy vandaan kom nie. Elke keer as Meghan closure kry, word haar hele lewe omvergewerp. En dié keer het dit gevaarlike gevolge vir haar en die baba. Jacques (Werner Coetser) is bekommerd oor die veiligheid en gesondheid van Meghan en hul baba.
Zelda (Sandi Schultz) en Bybie (Lizz Meiring) is self paniekbevange en wag vir iets om te gebeur.
Lettie (Stephanie Baartman) se ma kom kuier, maar vir Henry (Stiaan Bruwer) en Lettie is dit alles behawe ’n happy family reunion. Hier kom groot drama!
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Suidooster
Siya (Gantane Kusch) en Danni (Vashti Prins) moet groot besluite maak, maar hoe weet ’n mens wat die regte besluit is?
Brendan (Caleb Arnolds) veg nog vir sy lewe, terwyl Carlo (Jadon Booysen) en sy familie baklei om hom uit die tronk te hou.
Ty (Maurice Paige) en Lee-Ann ( Portia Joel) raak nou desperaat, maar is dit te laat om Carlo te red? Die Daniels-gesin moet dié week ’n paar drastiese besluite neem… Besluite waaroor geen ouer ooit wil dink nie.
Kate (Annelise Weiland) en Rassie (Jürgen Hellberg) se verhouding neem ’n verrassende wending, terwyl Susan (Natasha van der Merwe) en Justin (Eden Classens) albei vir ’n slot op Rassie se radiostasie baklei.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up
