Hier is waarna jy hierdie week (6 tot 9 Januarie 2025) op Suidooster en Diepe Waters kan uitsien.
Diepe Waters
Rossouw (Altus Theart) vind uit oor Anja (Reandi Grey) se groot planne ná orkaan Candy (Christia Visser) hul verhouding getref het. Hy besef nou eers sy fout, maar spyt kom mos altyd te laat. Dis asof Rossouw blind was vir al die flikkerende rooi ligte én flapperende rooi vlae. Hy het nog gehoop hulle het ’n toekoms, maar hierdie nuwe verwikkeling kan die einde van sy verhouding met sy sielsmaat beteken.
Fourie Bester (David Louw) maak nog net moeilikheid vandat hy in Boskruin aangekom het, maar hierdie week is dit glad te ongemaklik om te sien! René (Marijke Coetser) se moederinstinkte het vir haar gesê sy moet haar seun vat en wegkom van haar verlede en die Besters, maar toe oortuig Zelda (Sandi Schultz) haar om te bly… en nou gaan haar grootste vrees waar word. Op die ergste manier!
Tommie (Righard van Jaarsveld) vind hierdie week uit wat gebeur as jy jou pa aanvat, maar die arme ou het nie regtig ’n keuse gehad nie. Dit is of hy vat sy pa aan, of hy vat sy meisie, Tomi (Deoudone van der Merwe)… En iets sê vir my Tomi laat nie met haar mors nie.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Suidooster
Trouklokke lui hierdie week in Ruiterbosch, maar nie almal is gelukkig daaroor nie. Dit is hoekom ek nooit in ’n plek kleiner as ’n stad kan bly nie. Ek wil nie nog my eks en sy nuwe of ou vrou raakloop nie. Ek wil nog minder ’n vriendekring deel. Dit is erger as ’n egskeiding wanneer vriende tussen ekse moet kies. Maar dit lyk nie as of enige iets vir Hanli (Celeste Loots) en Riaan (Daniel Coetzee) pla nie. Kate (Annelisa Weiland) wil ook nie kla nie, want ten minste is haar seun steeds in die Kaap.
Intussen probeer almal vir Bianca (Simone Biscombe) beskerm, maar dinge gaan rof. My hart voel nogal baie seer saam met haar.
Nazeem (Irvine van der Merwe) is besig met sy nuutste planne en die sentrum word weer geteiken. Hy kan net nie sy ousus en haar besighede in vrede los nie.
Wade (Dean Smith) is altyd my held, hy sal altyd veg vir wat reg is al glo niemand hom nie en al lyk hy altyd soos die vark. Soms is hy wel onnodig, maar hierdie keer is ek bly dat iemand vir Damian (Caleb Felix) in sy plek sit en die vroue van Ruiterbosch beskerm. Damian kan ek sommer sien is die volgende Tim (Marco Spaumer) en ek hou glad nie daarvan nie.
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up, DStv Stream en Showmax.
