Ons het die inside scoop oor die grootste storielyne wat hierdie week in Binnelanders en Suidooster gaan uitspeel. Moenie worry nie, dié sepievoorskou het geen spoilers nie!
Binnelanders
Conrad (Hykie Berg) begin al meer besef dat die ou Conrad dalk nie ’n gentlemen was nie. Hy probeer hard om die stukke van sy geheue bymekaar te skraap, maar met dié dat sy geheue nog nie teruggekom het nie, is daar baie wat nog nie sin maak nie. Hy begin ook wonder of hy regtig weer die ou Conrad wil wees. Dinge tussen hom en Nicolette (Kate Roothman) is nog effens ongemaklik, maar dalk is daar nog ’n kans vir Conrad 2.0.
Febé (Claudia Jones) het glad nie ooghare vir Ella (Marlee van der Merwe) nie. Maar is haar probleem met Ella of haar bose skaduwee Marissa (ook Marlee van der Merwe)? Now you see her, now you don’t! Marissa lei almal by Binneland om die bos, terwyl Ella se reputasie deur die modder gesleep word. Maar selfs die beste doppelgänger gaan een of ander tyd ’n fout maak. Naomi (Je-ani Swiegelaar) raak agterdogtig, maar gaan sy betyds die sommetjies kan maak om die raaisel op te los?
Tracy (Melinda Brink) het nog net die boep, maar nog nie die ring nie en dit laat haar onseker voel oor die toekoms. Tertius (Reynardt Hugo) se optrede help glad nie, want waar daar ’n rokie trek, is daar gewoonlik ’n vuurtjie. Sy vreemde optrede laat rooi vlaggies wapper. Maar soms is daar ’n eenvoudige antwoord vir hoekom dinge nie is soos dit lyk nie.
Liam (David Viviers) durf uiteindelik die langpad aan, maar vreemde saadjies word in Karen (Luandri Reynders) se kop geplant. Dit laat haar twee keer dink oor haar keuse om Liam te ondersteun.
Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.
Suidooster
Rassie (Jürgen Hellberg) se dae is getel. Nazeem (Irvine van der Merwe) se geheue is soos dié van ’n olifant. Skurke soos hy vergeet nie maklik as iemand hom iets skuld nie.
Rassie en sy span by Radio Dassie werk aan ’n meesterplan om van Nazeem ontslae te raak, maar of hulle daarin sal slaag, is ’n saak vir gebed. Nazeem is slinks, so Rassie beter met een oog wakker slaap.
Aiden (Theodore Jantjies) is opgewonde oor sy broertjie se aankoms in Ruiterbosch en hoop dat hy hierdie keer ’n nuwe bladsy sal omslaan. Gary (Craig Adriaanse) is vol mooi praatjies, maar is dit egter waar dit stop. Net soos ’n luiperd nie sy kolle kan verander nie, is dit ook moeilik vir Gary om sy streke te los. Ruiterbosch se gemeente beter wakker wees, want hier kom ’n tech savvy gevaar.
Mymoena (Jill Levenberg) en Kaashifa (Jawaahier Petersen) het ’n lat vir hulself gepluk en kan dit nie meer omkeer nie. Die kompetisie tussen dié twee is nou erger as deelnemers van die reeks Food Wars.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
