Ons het die inside scoop oor die grootste storielyne wat hierdie week in Diepe Waters en Suidooster gaan uitspeel. Soos altyd is dié sepievoorskou spoiler free!
Suidooster
As jy ’n ooreenkoms met die duiwel wil aangaan, dan moet jy maar die hitte kan hanteer! Dit is egter makliker gesê as gedaan – vra maar vir ou Rassie (Jürgen Hellberg) wat in Ruiterbosch se duiwel se kloue vasgevang is. Die ou gesegde lui mos: “Meng jou met die semels, dan vreet die varke jou…”
Rassie sukkel om sy geheim te hou, want Susan (Natasha van der Merwe) hou haar lyf speurder en gaan nie rus totdat die waarheid uit is nie. Justin (Eden Classens) sal eerder sy kop in die sand wil druk, maar elke Sherlock het hul eie Watson nodig, en ongelukkig vir hom is Susan baie oortuigend.
’n Nuwe gesig daag hierdie week in Ruiterbosch op en met sy aankoms is dit alles behalwe ’n gelukkige familie-reünie vir Aiden (Theodore Jantjies). Aiden se broertjie kom smokkel net met sy kop en dit plaas vir Aiden in ’n baie moeilike situasie.
Intussen sukkel Siya (Gantane Kusch) en Danni (Vashti Prins) nog om vir Zenobia (Abigail Mei) met Brendan (Caleb Arnolds) te vertrou. Iets gebeur dan wat Siya en Danni in ’n hoek druk. Maar hoe dinge uitdraai, verbaas vir almal – veral vir Brendan.
Die vrede tussen Mymoena (Jill Levenberg) en Kaashifa (Jawaahier Petersen) hou nie lank nie. Natuurlik word almal in Ruiterbosch by dié oorlog ingetrek. Ek hoop almal hou ’n boksie Rennies byderhand, want teen hierdie tempo gaan ons dit nodig hê.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up
Diepe Waters
Riaan (Ryno Hattingh) mag dalk sy lankverlore dogtertjie se held wees, maar ons almal weet hy is ’n wolf in skaapsklere. Hy was alreeds woedend toe hy uit die tronk uit gekom het, maar nou laat Zelda (Sandi Schultz) en Gys (Justin Strydom) sy bloed regtig kook.
Elke pa wil hul dogter beskerm en Gys onderskat hierdie keer die verkeerde man! Gys se obsessie met geld, sukses en beheer plaas Pam (Tracey-Lee Olivier) se lewe in groot gevaar.
Charity (Dané de Waal) wys vir Karla (Daniélle Swanepoel) wie’s baas. Maar dit is dalk presies wat Karla nodig het om die strydbyl te begrawe. Maar terwyl Karla met Charity oor trofeë baklei, veg Johan (Liam Bosman) hard om haar hart te wen.
’n Nuwe man vang Sanet (Nadia Valvekens) se oog, maar iets sê vir my dit is weer ’n geval van verbode liefde.
Meghan (Lea Vivier) het dalk ’n manier gevind om saam met Jacques (Werner Coetser) te wees. Maar wat beteken dit vir die res van die familie en hoe gaan die sibbe daaroor voel?
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
