Sepies op ons radar dié week is Binnelanders, 7de Laan en Arendsvlei.
Binnelanders
Conrad (Hykie Berg) kan gelukkig wees dat Tracy (Melinda Brink) so lief is vir hom, want as iemand vir my so min aandag gegee het – en boonop dan my lewe in gevaar stel – sou ek hom net daar soos ’n warm patat gelos het. Ek weet hy probeer haar net beskerm, maar Conrad kan ten minste romanties probeer wees. Hy kan gerus ’n bladsy of twee uit Thys se boek neem as dit by romanse kom. Ek weet nie meer of Rita (Ilana Cilliers) saam of teen Conrad werk nie, maar kom ons hoop dat Conrad se plan dié week werk. Hopelik kan almal dan weer rustig slaap.
Kyk Binnelanders op DStv Online.
7de Laan
Ná twee maande se treur en ’n roerende gedenkdiens vir Marvin (Duncan Johnson), was daar nie ’n droë oog in die kerk toe Khethiwe (Sesethu Ntombela) tydens ’n Days of Our Lives-oomblik langs die sy van ’n springlewendige Marvin by die kerk instap nie. Khethiwe het seker gedink sy droom toe sy haar skoonpa voor haar sien staan.
Die afgelope paar maande was ’n nagmerrie vir Marvin se familie, ná hy en Werner (Zak Hendrikz) ontvoer is en later vermoedelik dood verklaar is. Let wel, “vermoedelik’. Dit was ’n hartseer tyd vir die hele gesin, maar veral vir Marvin se kinders. Hulle het die nuus swaar ontvang. Ivy (Nazli George) wou nie glo dat haar man dood is nie, maar het later vir die kinders se onthalwe closure probeer vind. ’n Dankbaar en verstomde Ivy het op haar knieë geval toe sy haar man by die kerk sien instap.
My hart was so seer vir Khethiwe nadat haar ouers besluit het dat hulle gaan nie haar troue bywoon nie. Meeste bruide droom van daardie spesiale oomblik as jy op jou troudag saam met jou pa by die kerk instap. Ek kon nie self ’n beter oomblik geskryf het nie. Dit was ’n reünie om te onthou. ’n Reünie wat vir ’n baie lang tyd in my hart sal bly.
Maar, al is almal verlig, is daar so baie vrae! Waar was Marvin die heeltyd, wat presies het gebeur en wat beteken dit vir die Welman-gesin, wat weer in die middel van alles is? Ons sal maar dié week moet hoor watter antwoorde Marvin vir ons gaan gee.
Dít terwyl Mariaan Welman (Deirdre Wolhuter), ná haar ongeluk dalk vir die res van haar lewe verlam gaan wees. Is dit karma? Want ek dink om vasgevang in haar eie liggaam te wees, sal erger as tronkstraf vir haar wees!
Kyk 7de Laan op DStv Online.
Arendsvlei
Terwyl mense uit die dood in 7de Laan herrys, het Arendsvlei vir ons bederf met ons eie romantiese Afrikaanse Titanic-liefdestoneel. Dit het gelyk asof Bianca (Riana Alfreds) se tone sommer net daar gaan omkrul van plesier toe Thys (Sherman Pharo) so sensueel haar been met ’n verfkwas streel en sy vir hom sê “verf my soos ’n French masterpiece”. In daardie oomblik het Bianca se toneelspel, Kate Winslet se Titanic-toneel ’n bietjie konserwatief laat lyk.
Hierdie twee is soos twee jong verliefde tieners en ek is mal daaroor. Bianca lyk deesdae weer lus vir die lewe en hul romanse het sommer vir haar ’n style update gegee. Sy trek nou veel jonger aan en selfs haar hare en grimering het verbeter. Dalk sit ek nou die pot heeltemal mis, maar dit is hoe dit vir my lyk, veral omdat Bianca altyd so ’n awkward ou tannie energie afgegee het. Ek kan nie wag om te sien hoe hul romanse uitspeel nie. Tussen hul liefde, en Janice (Crystal-Donna Roberts) en Lionel (Jody Abrahams) se nuwe baba, lyk dit asof dinge vir ’n slag goed gaan in die Vlei. Maar Natalie (Carmen Maarman) soek nou haar erfporsie van haar seun se bakkery… So kom ons sien watter drama dit hierdie week gaan veroorsaak.
Kyk Arendsvlei op DStv Online.
