John Cena hervat sy rol as Peacemaker, die jingoistiese moordenaar mense links en regs in die naam van vrede afmaai. Die doel heilig mos die middelle, of hoe?
Peacemaker se storielyn tel op waar The Suicide Squad-fliek s’n geëindig het. Ons sien Peacemaker terug by die huis ná sy stryd met Bloodsport. Hy kom egter gou agter dat vryheid, nes vrede, nie gratis en verniet is nie.
Die reeks, wat deur die veelbekroonde James Gunn (van Guardians of the Galaxy-faam en The Suicide Squad) geskep is, strek oor agt episodes.
Jennifer Holland hervat haar rol as Emilia Harcourt uit The Suicide Squad. Só ook Steve Agee sy rol as John Economos.
Ook in die rolverdeling is onder andere Danielle Brooks (Orange is the New Black) en Freddie Stroma (Harry Potter and the Half-Blood Prince).
Peacemaker S1 is nou op Showmax met die tweede seisoen reeds in die pyplyn. Jy kan John Cena ook in aksie in Fast & Furious 9: The Fast Saga sien.
