Die kern van Outlander, gegrond Diana Gabaldon se gelyknamige reeks boeke, is Jamie (Sam Heughen) en Claire (Caitríona Balfe) se epiese liefdesverhaal. Dit strek immers oor eeue heen. Hul storie het begin toe Claire in die eerste seisoen onwillekeurig uit 1945 na 1743 in Skotland deur tyd reis.
Oor die afgelope vyf seisoene van Outlander het daar ’n magdom lief en leed afgespeel.
Die sesde seisoen tel op waar die vyfde geëndig het met Claire en Jamie wat die uitdagings van ’n nuwe lewe in koloniale Amerika – die sogenaamde “New World” – moet hanteer.
Nog ’n stok in die wiel – Jamie se verlede kom spook by hom as ’n voormalige medegevangene ook daar aanland en sake vir hulle bemoeilik.
Outlander se sesde seisoen is wel die kortste nog – net agt episodes. Dit is egter gelukkig reeds vir ’n sewende reeks hernu. Boonop is daar sprake van ’n prequel-reeks wat ook glo op pad is…
Weeklikse episodes vanaf Dinsdag, 5 April, om 22:30 op M-Net (DStv-kanaal 101) en DStv Online.
