Menu terloops
In Wat om te kyk [10 Jul 2025]

Nog ’n rugbyspeler vir ‘Op my eish!’ Ruan se tweelingbroer ook deel van losgemaal as ‘wingman’


In die nuwe seisoen van kykNET se gewilde realiteitsreeks ‘Op my eish!’, sal Ruan Smith se tweelingbroer JP hom as vertroueling en klankbord bystaan soos Ruan voor die kameras na liefde soek.

Kyk solank S2 en S3 van Op my Eish!

Nog ’n rugbyspeler vir ‘Op my eish!’ Ruan se tweelingbroer ook deel van losgemaal as ‘wingman’
Kyk lokprent

Wat is ’n wingman? Dis daardie een persoon wat jou ken op jou beste én slegste; die een wat jou gaan aanmoedig om jou hart te volg, maar jou ook reguit gaan sê as jy besig is om jou kop te verloor. Iemand wat eerlik is, lojaal is en daar is as dinge moeilik raak. Vir Ruan Smith is daardie iemand nie net ’n vriend nie – dit is sy identiese tweelingbroer, JP Smith.

“Dis ’n absolute eer. Dit is awesome,” sê JP. “Ons is ongelooflik close en ken mekaar goed. Dis vir my ’n nuwe uitdaging. So, dit gaan interessant wees. Ek en Ruan het al baie saam deurgemaak – moeilike én goeie tye. So, ek weet wat is die beste vir hom. Ek gaan eerlik wees soos altyd. Ek het sy beste belange op die hart,” sê hy. 

Die twee broers het nie net ’n hegte band nie, maar ook ’n indrukwekkende geskiedenis saam op die rugbyveld. JP het in sy loopbaan vir spanne soos die WP (2010), die Brumbies (2014–2015), Canberra Vikings, Stormers (2016), Reds (2018–2020), LA Giltinis (2021) en die Lions (2021–2024) uitgedraf. Hy en Ruan het, onder meer, saam vir die Brumbies, Reds en Lions gespeel. Deesdae bestuur hulle saam ’n rugbykliniek, Eight7, waar hulle jong talent help ontwikkel.

Hy weet waarna Ruan soek

JP weet presies waarna Ruan op hierdie stadium in sy lewe soek: stabiliteit, opregtheid en iemand wat gemaklik is in eenvoud.

“Ruan soek iemand wat rustig is – nie iemand wat heeltyd op pad of bedrywig moet wees nie. In ons loopbane was ons baie besig en het min tyd vir onsself gehad. So, iemand wat tyd by die huis waardeer, is vir hom belangrik. Nie ’n high-maintenance persoonlikheid nie – net iemand wat gemaklik is in normale, rustige tye.”

Maar dit gaan nie net oor gemak nie. JP glo Ruan het ’n maat nodig wat selfstandig en familie-geörienteerd is. “Hy wil nie iemand hê wat verwag hy moet álles doen nie. ’n Verhouding gaan oor saam bou – nie net in een rigting gee nie. Ja, dis belangrik dat ’n man sy rol speel, maar dit moet wedersyds wees.”

Dís hoe jy weet Ruan is verlief…

Op die vraag hoe hy weet wanneer Ruan regtig verlief is, antwoord JP sonder om te huiwer: “As hy opofferings maak in sy daaglikse lewe vir iemand, dan weet jy dis ernstig. Hy gee nie maklik daardie deel van homself prys nie. So, as hy begin aanpas vir iemand, beteken dit baie.”

“Ruan is eintlik ’n baie sagte ou,” sê JP. “Hy sit sy guard op, veral in nuwe verhoudings, maar as jy hom leer ken, is hy ’n ongelooflike lojale omgeemens. Ek hoop mense sien daardie kant van hom in die reeks – nie net die sterk rugbyspeler nie, maar die groot teddiebeer wat hy rêrig is.”

En as jy bekommerd is jy gaan die twee op die skerm verwar?

“Ons is baie dieselfde, maar ons persoonlikhede is ook effens verskillend. Jy sal dit begin raaksien. En as daar enige verwarring is – ek is die slimmer een,” sê JP met ’n lag.

Hy glo Op my eish! bied ’n unieke geleentheid vir sy broer: “In vandag se lewe is ’n mens so besig dat dit al moeiliker raak om liefde op ’n natuurlike manier te vind. Hierdie reeks gee hom die kans om homself oop te maak, om weer te probeer. En as ek ’n klein deel van daardie reis kan wees – dan is ek daar.”


Inskrywings vir die nuwe seisoen van Op my eish! is tans oop. Vroue wat gereed is vir ’n kans op liefde, kan inskryf by kyknet.tv.

Kyk S2 en S3 van Op my Eish! op Showmax.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

kykNET se nuwe mini-dramareeks is ’n verhaal van verlies, vergifnis en hoop

Twee mans se paaie kruis in ’n ondersteuningsgroep ná die verlies van geliefdes. kykNET se 'Elke donker wolk' verken hoe ’n onverwagse vriendskap ruimte skep vir vergifnis, genesing en hoop.

Meer

Rubriek: Gaan griffel in Ouma se resepteboek! ‘Kokkedoor: Klassiek’ is terug! 

Ná ’n voorskou van die eerste episode laat 'Kokkedoor: Klassiek' vir Marteni Burger verlang na haar ouma se resepte én sien sy uit na nog skeppies nostalgie - met ’n knippie kombuisdrama en verrassende kinkels daarby.

Meer

Van die veld tot die kelder – kuier dié November saam met VIA

Van wildplase en wynkelders tot huise met karakter: VIA se November-aanbod beloof vars ontdekkings. Kuier saam met Shari Kennedy, Leandie du Randt, Frank Rautenbach en JP Quickelberge, en leer ken die mense, stories en plekke wat Suid-Afrika so besonders maak.

Meer

Chanél Muller oor ‘Sy, die meeue en die Heilige Gees’

"Enige persoon se geloofsreis is ’n baie persoonlike reis, en dit gebeur alles baie innerlik", sê Chanel Muller, die skrywer, regisseur en vervaardiger van die kykNET-reeks 'Sy, die meeue en die Heilige Gees'.

Meer
Sien alle opsies