Miss Scarlet and The Duke speel af in Victoriaanse Londen. Die storie draai om Eliza Scarlet (Kate Phillips) wat ná haar pa se dood besluit om sy private speuragentskap oor te neem. Die derde seisoen word op DStv uitgesaai. Die reeks is ook reeds vir ’n vierde seisoen hernu.
Baie soos in die Netflix-reeks The Law According to Lidia Poët, en die Enola Holmes-flieks, blyk ’n groot gros mense te dink dat dié bedryf nie vir ’n vrou beskore is nie. Wel, Scarlet – nes Lidia en Enola – is min gespin… (Die reeksskepper, Rachael New, het immers haar karakter op dié van Elizabeth Bennet, die heldin in Jane Austen se Pride & Prejudice, geskoei.) En sy het darem ook haar vriend, die polisie-speurder William Wellington, oftewel “The Duke” (Stuart Martin). Saam-saam ondersoek dié twee misdade en los sake op, al hap hulle ook heeltyd na mekaar.
James Jackson van die Times (UK) skryf oor die reeks: “Hierdie soort misdaadraaisel is amper ’n bedreigde spesie. Laat ons dus dankbaar wees dat dit in die omtrek is.”
Dis ’n lighartige, tog aangrypende reeks. Scarlet se vasberadenheid om haar plek te vind in ’n wêreld wat deur mans oorheers word, help om die vertelling gravitas te gee.
Weeklikse episodes van die derde seisoen van Miss Scarlet and The Duke vanaf Maandag, 26 Junie 2023, om 20:00 op BBC Brit (DStv-kanaal 120). Ook op Catch Up beskikbaar.
