Showmax se Boetie Boer, Inside The Mind Of A Monster neem kykers terug in tyd na 1990. Soos die ANC ontban, en Nelson Mandela ná 27 jaar in die tronk vrygelaat word, begin Stewart ‘Boetie Boer’ Wilken sy moordtog in Port Elizabeth, nou Gqeberha. Soos die joernalis Brett Adkins in die lokprent sê: “Toe hy in hegtenis geneem is, het dit geklink soos iets uit ‘n fliek. Skielik het ons ’n reeksmoordenaar gehad.”
“Wilken was ’n hoogs ongewone reeksmoordenaar,” sê dié dokumentêre reeks se regisseur Jasyn Howes (Dula).
“Anders as die meeste reeksmoordenaars, het hy meer as een soort slagoffer gehad. Hy het oorwegend vroue sekswerkers en jong seuns, gewoonlik straatkinders, van verskeie rasse geteiken. Hy het ook beweer dat hy nekrofilie en kannibalisme met sy slagoffers beoefen het.”
In die lokprent bespreek Wilken openlik sy misdade met dr. Gérard Labuschagne, die voormalige afdelingshoof van die polisie se ondersoekende sielkunde-afdeling.
“Labuschagne het vir ons sy opname van net meer as drie ure gegee, waarin Wilken, in sy eie woorde, alles vertel wat hy gedoen het,” sê Howes.
“Wilken was teen daardie tyd reeds agt jaar in die tronk. Hy is reeds tot lewenslange tronkstraf gevonnis, so hy het geen ooglopende rede gehad om iets weg te steek nie.”
Wilken se weergawe van gebeure word vergesel deur onderhoude met sers. Ursula Barnard van die polisie se kinderbeskermingseenheid, asook sers. Derick Nosworthy van die moord-en-roof-eenheid. Albei het sleutelrolle in Wilken se vervolging gespeel. Daarbenewens voer Howes ook onderhoude met die familie van een van Wilken se slagoffers, Georgina Zweni, en met Wilken se kinders, Sonika en Sergius.
Die 90’s was ook die era van die ABC-moordenaar, Moses Sithole, en die sogenaamde “Station Strangler”-beskuldigde, Norman Simons, wat in Julie 2023 op parool vrygelaat is. Ten spyte daarvan dat hy ten minste sewe moorde gepleeg het, het Wilken se misdade dus nie soveel dekking ontvang soos wat ’n mens sou verwag nie.
“Ten tyde van sy moorde het Wilken se saak grootliks ongemerk in die res van die land gebly, aangesien daar terselfdertyd meer hoëprofiel-moordenaars op vrye voet was,” sê Howes.
“Daar is min tot geen video- of radio-argief nie, hoewel daar meer koerantdekking was. Ons moes dus op reaksies steun om die storie visueel lewe te gee. Ek is beïndruk deur dokumentêre reekse soos Wormwood wat werklik probeer het om die ware misdaad-genre in ’n nuwe rigting te stuur, en wat die grense tussen dokumentêre en verhalende rolprentvervaardiging vervaag het. Dít het ons die geleentheid gebied om die genre plaaslik te verhef en die gehoor ’n meer filmiese kykervaring te gee.”
Die vyfdelige dokumentêre reeks is ’n koproduksie tussen Stage 5 Films en Howes se Fifth Floor Films. Dit is die derde dokumentêr, en eerste ware-misdaad-dokumentêre reeks, van Stage 5 Films. Dit bou voort op die sukses van Unearthed, en The Journeymen. Stage 5 Films se prestasie-rekord sluit ook die studente-Oscar-wenner Lakutshon’ Ilanga en die Suid-Afrikaanse Oscar-inskrywing, Noem My Skollie in.
Boetie Boer het ‘n ouderdomsbeperking van R18, en premiere op Showmax op 18 Oktober 2023, met nuwe episodes elke Woensdag. Nie vir sensitiewe kykers nie.
