Die glans van sosiale media kry ’n donker kinkel in Bad Influencer, Netflix se nuwe plaaslike misdaaddrama, met ’n sterbelaaide rolverdeling wat akteurs soos Jo-Anne Reyneke (Black Tax, Red Ink), Cindy Mahlangu (Blood & Water, Kings of Jo’burg), Emmanuel Castis (Isidingo, Diepe Waters), Brendan Daniels (White Lies, Unseen), Julia Anastasopoulos (Tali’s Baby Diary), en selfs die voormalige Mej. Suid-Afrika én Mej. Heelal Zozibini Tunzi in haar eerste groot rol insluit.
Die reeks, met regie deur Safta-wenner Ari Kruger (Tali’s Baby Diary) en Keitumetse Qhali (Blood & Water), draai om Jo-Anne Reyneke se BK, ’n enkelma wat desperaat is om vir haar seun met spesiale behoeftes te sorg. In die lokprent sien ons hoe sy dan kragte saam met ’n sosiale media-influencer, Pinky (Cindy Mahlangu) om vervalste ontwerpershandsakke te verkoop.
Dis ’n winsgewende bedrogspul, maar dan trek hulle ongelukkig die aandag van Bra Alex (Vincent Mahlape, Silverton Siege) en Jobs “Flames” Jiyane (Hamilton Dlamini, Shaka iLembe, Reyka), misdaadbase wat die stad se onderbuik met ystervuiste regeer, én ook die owerhede. Hulle is ’n onwaarskynlike duo, maar hulle is op mekaar aangewese in ’n ongenaakbare oorlewingstryd.
Die reeks, bestaande uit sewe episodes, kom vanuit die skeppersbrein van Kudi Maradzika (Black Tax, Isono) en Lincoln Green Media, en is deur Gambit Films (Blood & Water, Unseen, Nommer 37) vervaardig.
Bad Influencer is vanaf 31 Oktober 2025 op Netflix beskikbaar.
Kry Netflix met DStv
DStv-intekenare kan met die nuwe Explora Ultra toegang tot Netflix kry. Kry dit nou →
