Juffrou X, wat vanaf Dinsdag, 30 April 2024 op dié kykNET uitgesaai word, is ’n donker en boeiende dramareeks uit die pen van Tertius Kapp. Hy dien ook as die reeksregisseur. Meerfout Films se Berdene Burger is die vervaardiger, met Janhendrik Burger as die kinematograaf. Die reeks is in George, Hoekwil en Touwsranten verfilm.
Die storie draai om ene Juffrou X (Trix Vivier), die wiskunde-onnie by Victory Heights Sekondêre Skool, wat haarself in die rol van ’n vigilante bevind as ’n nuwe, dodelike dwelm dié plattelandse dorp – en die skool – tref. Die eindeksamen is nie minste van dié kinders se worries – hul alledaags is eerder ’n saak van lewe en dood.
Foto’s: Verskaf
“Die oorspronklike vonk was my suster, ’n onderwyseres wat soos Juffrou X ongelooflik baie doen vir haar kinders – alles van beursaansoeke tot matriekafskeidrokke. Die storie is egter daarvandaan as fiksie ontwikkel,” vertel Kapp oor die reeks se ontstaan.
Volgens hom het hulle besluit om die reeks in George te skiet, “onder meer omdat ons stereotipes wat mens tipies in ’n stad soos Kaapstad kry, wou vermy. Ook omdat ons ’n nuwe omgewing wou uitbeeld.
“Dis natuurlik ook ’n pragtige landskap, en die tema van hout en die bos loop deur die storie. Verder kom die oorspronklike inspirasie nie so ver daarvandaan nie.”
Buiten Trix as Juffrou X, óftewel Inge Bester, sluit die rolverdeling vir onder andere Bianca Flanders, De Klerk Oelofse, Clayton Evertson en Brendan Daniels in.
Juffrou X word vanaf Dinsdag, 30 April 2024, om 20:00 op kykNET (DStv-kanaal 144) en DStv Stream uitgesaai. Dit sal ook ná uitsending op Catch Up beskikbaar wees.
