Vir kykNET se Kokkedoor Vuur & Vlam is die bekende sjef Bertus Basson en braai-ghoeroe Kobus Botha as nuwe beoordelaars gekies.
Bertus is nie net een van Suid-Afrika se top-sjefs nie, maar is ook reeds ’n bekende gesig op Afrikaanse televisie. Só was hy die afgelope twee jaar die aanbieder van kykNET se In die Sop-werklikheidsreeks, waar hy en ’n span kundiges ingespring het om nuwe lewe in restaurante te blaas. (In die Sop is op Showmax beskikbaar om te stroom.)
Kobus is op sy beurt internasionaal as ietwat van ’n braaisensasie bekend. Hy woon die afgelope paar jaar in Frankryk waar hy vanweë sy vindingrykheid en kreatiwiteit oor die kole by privaatkuiers en spoggerige geleenthede groot aansien geniet. Kobus, oorspronklik van Oudtshoorn, besoek Suid-Afrika steeds baie gereeld. Só het hy ook hier in 2019 sy boek, Le Braai – Braai with a bit of je ne sais quoi, bekendgestel.
Die Kokkedoor-tafel is vir die eerste keer in 2013 vir kykers gedek. Oor die jare het spin-off-reekse soos Koekedoor, Kokkedoortjie en Koekedoortjie gevolg.
Vir Kokkedoor Vuur & Vlam gaan deelnemers egter alles in die vlamme, op die kole, binne-in die as of op die rooster moet voorberei. En inskrywings is steeds oop tot 31 Januarie 2023 met die reeks wat na verwagting vanaf Julie vanjaar uitgesaai sal word.
Maar hokaai eers – jy en jou kroos dink dalk jy is die ultimate braaier, maar vir dié reeks word braai ’n spansport: kykNET soek na die perfekte span-kombinasie van ’n onthoubraaier en kinkelbraaier. ’n Onthoubraaier het nie formele sjef-opleiding en professionele ondervinding nie, maar hul hart klop warm vir tradisionele kos. Hulle word gekies vanweë hul vernuf as ’n tuisbraaier en hul kennis van onthoukos. Daarenteen word Kinkelbraaiers gekies juis vir hul kwalifikasies of hul ondervinding in ’n erkende restaurant of professionele kombuis.
Kokkedoor Vuur & Vlam word deur Homebrew Films vervaardig.
Skryf só in:
Besoek www.kyknet.tv, stuur ’n video per WhatsApp-boodskap na 064-736-5013 of stuur ’n e-pos na navrae@kokkedoor.tv. Elke persoon se inskrywingsvideo, maksimum drie minute lank, moet die volgende inligting bevat:
- Stel jouself bekend;
- Vertel wie jy is;
- Waar kom jy vandaan;
- Is jy ’n onthou- of ’n kinkelbraaier, en hoekom;
- Hoekom wil jy deelneem.
Reëls:
Hoe oud moet iemand wees om deel te neem? Jy moet ten minste 18 jaar oud wees op die dag van die oudisie.
Kan enigiemand inskryf? Enige Suid-Afrikaanse of Namibiese burger wat ’n geldige identiteitsdokument het, kan inskryf.
Wanneer vind die oudisies plaas? Vir diegene wat die kortlys haal, sal oudisies in Februarie plaasvind.
Wanneer en waar gebeur verfilming? Persone wat deurdring om deel te neem, moet gedurende April/Mei in die Kaap-omgewing beskikbaar wees.
