Die vier oorblywende spanne in dié seisoen van Kokkedoor: Son & see – Shireen en RJ, Andrew en Leoné, Caroline en Anél en Hanna en Dirk – se eerste uitdaging in vandeesweek se episode was om die beste gourmet-toebroodjie te maak met die allerlekkerste oorskietkos wat op hul onderskeie stasies op hulle gewag het. Hulle kon ’n TV-braai of ’n lugbraaier gebruik en het ’n groot keuse van brood in die spens gehad. Daar is alles van koperpennieslaai en beet tot tong en skaapboud gebruik.
Die wenspan – weer Hanna en Dirk – het ’n Victorinox-messegeskenkpak ontvang. Dirk het erken die aantal kere wat hulle al gewen het, begin verwagtinge skep. Maar hy hou nog die teuels styf vas…
Hannes van Wyk was die spesiale gas vir die hoofuitdaging: ’n piekniekmandjie wat ’n slaai met sewe lae, bekend as lagie-slaai, asook ’n souttert moes bevat. Voor die spanne eger kon wegspring, moes elkeen ’n Plascon-kleurkaart trek wat dan as inspirasie moes dien. Daar was drie kleure – rooi, groen en geel – asook ’n joker-kaart wat die span die geleentheid gegee het om hul eie kleur te kies. Hulle het tien minute vir beplanning en 80 minute vir die voorbereiding gekry.
Hier is wat die spanne gemaak het:
Wie bly en wie groet?
Die top-twee was Hanna en Dirk en Andrew en Leoné, met die pastoor-pa en sy dogter wat as die wenners aangewys is.
Dit was ongelukkig tyd vir Shireen en RJ om te groet. “Ons het ’n baie lekker tyd gehad, ons het baie geleer, baie nuwe mense ontmoet en dit was vir my ’n fantastiese ervaring met my seun,” het Shireen gesê. (Lees ook ons onderhoud met dié twee oor hul Kokkedoor-ervaring.)
En nou is dit tyd vir die semi-finaal!
Vyf wenke uit die Kokkedoor-kombuis in dié episode
- Wanneer jy groente in ’n souttert gebruik, maak seker om al die vog uit te druk anders kan dit te waterig wees. – Yolani
- ’n Souttert moet genoeg vulsel bevat anders is dit net ’n koekie met ’n vulsel. – Herman
- Die kern van kool moet uitgesny geword wanneer jy dit in ’n slaai gebruik aangesien dit nie lekker is om te eet nie. – Herman
- Wanneer jy jou tertdeeg blink bak, haal die boontjies of rys ná ’n tyd af sodat die deeg verder op sy eie kan bak. Die deeg moet sy blink voorkoms verloor en dan weet jy dit is deurgaar. – Herman
- Onthou om genoeg sout en peper in jou tert te gebruik wanneer dit koud geëet gaan word. – Herman
Kokkedoor: Son & see saai Donderdae om 20:00 op kykNET en DStv Stream (DStv-kanaal 144) uit. Episodes is ook ná uitsending op Catch Up beskikbaar.Kyk ook Kokkedoor Vuur & vlam op Showmax.
