Dit was ’n geskarrel teen die einde, maar al ses van die Klein Paradys-spanne het slaapkamers gehad vir die beoordelaars om na te kyk. Aan die einde van die beoordeling was die wenspan net .2 punte bo die span in die tweede plek.
Die wenners
Juan-Louis en Elri van Intak met 4.3 punte
Die beoordelaars was veral beïndruk met dié pelle van Potch se gebruik van ruimte en die veeldoeligheid van die slaapkamerarea. Wicus Pretorius het gesê dit is duidelik hulle dink met ’n mikro-eenheid in gedagte. Jess Pieters was beïndruk met die span se inisiatief om ’n ekstra enkelbed onder die dubbelbed te versteek, en Magdalena Bobotoni het hulle gekomplimenteer oor die plasing van die bed en die uitsig wat dit bied.
Behalwe dat Juan-Louis en Elri nou die nuwe toesighouers is en drie ure van die konstruksiespan gewen het, het hulle ook met ’n geskenkbewys van R20 000 van Cielo vir hul persoonlike gebruik weggestap.
Tweede plek
Maggie en Gerrie van Palimpses met 4.1 punte
Gerrie wou bitter graag wen, maar hulle het naelskraap in die tweede plek geëindig. Die beoordelaars was beïndruk met hoeveel pakplek in die eenheid is, die inkleding met boeke en klere en selfs ’n bril in die een nissie, asook die vollengte-spieël wat slim geposisioneer is.
Gesamentlike derde plek
Lee-Ann en Johann van Asem met 4.0 punte
Die grootste kritiek wat Lee-Ann en Johann gekry het, was dat daar nie genoeg pakplek is nie en te min lig. Die bed gaan ook moeilik wees om op te maak as gevolg van hoe dit geplaas is. Wicus was egter beïndruk met die ligstrook wat van die vloer, oor die dak en weer aan die ander kant tot op die vloer loop.
Mika en Jannie van 22 met 4.0 punte
Hoewel die beoordelaars beïndruk was met die span se vakmanskap, was hulle nie seker waarheen Mika en Jannie met die ontwerp op pad is nie. Daar is ook volgens hulle te veel ruimte gemors.
Vierde plek
Klaas en Yvett van Meerkat met 3.8 punte
Die beoordelaars was dit eens dat die muurpapier ’n wenner is en het die span gekomplimenteer op die gebruik van aangekoopte items. Daar is egter nie naastenby genoeg pakplek soos die eenheid nou daarna uitsien nie.
Vyfde plek
Alicia en Claudia van Kaapse Nooi met 3.5 punte
Die sussies van Bloem was weer stram met mekaar ná ’n onderonsie, maar hulle het vrede gemaak en kon betyds hul slaapkamer wys. Hoewel die beoordelaars hulle gekomplimenteer het op die feit dat hulle vloer so te sê klaar was, was die grootste kritiek dat Alicia en Claudia nie beplan met ’n mikro-eenheid in gedagte nie. Die spieël in die hoek van die slaaparea is ook te groot en sal moet skuif.
Wat volgende?
Die volgende opdrag aan die spanne was dat hulle die kombuise en leefareas moet klaarmaak – in net vier dae.
Klein Paradys is op Donderdae om 20:00 op kykNET (DStv-kanaal 144). Dit is ook op DStv Stream en Catch Up beskikbaar.
