Die Klein Paradys-spanne is moeg, en so hier en daar is hulle baie krapperig teenoor mekaar. As jy eers hoor een spanlid sê vir ’n medespanlid, “Moenie só met my praat nie”, dan moet jy weet, dinge raak warm.
Elke huis het sy kruis…
Yvett en Klaas het vasgesit oor hoe die vloer in hulle eenheid ingesit moet word. Hy wou aan een kant begin, en sy het gedink hulle moet aan die ander kant begin. Toe hy haar wou oortuig dat sy manier reg is, is sy daar weg met haar stert in ’n krul. Maar die goeie ding is dat hul muurpapier, ná ’n effense wankelrige begin, op is. Hulle hoop dít gaan die beoordelaars mateloos beïndruk.
Sonsitter
Jannie en Mika werk goed saam, maar wanneer daar te veel mense in hul eenheid is, verkies sy om alleen in die son te gaan sit. Jannie is ook steeds ’n groot opgaarder van gereedskap… Maar glo omdat hy reken die ander kyk nie mooi daarna nie.
Toetse
Gerrie en Maggie vorder en sien uit daarna om in die slaapkamer te begin slaap. Nadat sy verf by Tjhoko laat meng het, vertel Maggie dat sy nog altyd ’n verfkleur na haar vernoem wou hê. Die getroudes het erken dat dié kompetisie jou op alle vlakke toets – nie net in terme van tyd en energie nie, maar ook emosioneel.
Verlange
Juan-Louis en Elri se beplanning vorder goed, en elke stuk hout wat in die eenheid moet kom, word tot die millimeter uitgewerk. Hulle begin duidelik baie huis toe verlang en sê dat dit soms voel of hulle die hele tyd werk, maar nie die verskil kan sien nie.
Agterosse
Claudia en Alicia is nog bekommerd oor hulle plafon wat moet in, maar hulle het net een onmiddellike doel voor oë: om nie weer laaste in die volgende beoordeling te kom nie.
Voluit vorentoe
Lee-Ann en Johann werk elke moontlike oomblik wat hulle kan. Hulle is vasbeslote om die badkamer ook klaar te hê wanneer die beoordelaars kom om punte vir die slaapkamers te gee.
Maak mooi of Brandt sien rooi!
Die projekbestuurder, Brandt Bester, het genoeg gehad van die deurmekaar werkswinkel. Die spanne is summier ingeroep om te kom regpak en skoonmaak. Alicia het ’n verestoffer gegryp en begin afstof. Van die ander deelnemers het gemor dat Jannie en Mika weer lyf wegsteek en in hul eie eenheid werk terwyl die ander spanne regpak. Johann het as toesighouer ingegryp, en ’n groot klomp van die gereedskap wat Jannie opgegaar het, is terug na die werkswinkel.
R5 000 se wengeld
Die aanbieder, Robbie Kruse, het weer die spanne na die werkswinkel vir ’n uitdaging geroep. Elke span moes ’n bed binne vyf minute opmaak. Die beoordelaar, Magdalena Bobotoni, het Maggie en Gerrie as wenners van die R5 000 kontant aangewys. Dis deur die hoofborg, Capitec, geskenk.
Wat volgende?
In episode 8 word die slaapkamers beoordeel. Wie gaan as die wenners aangewys word? Maar belangriker nog: Gaan die spanne reg wees vir die beoordeling?
Klein Paradys is op Donderdae om 20:00 op kykNET (DStv-kanaal 144). Dit is ook op DStv Stream en Catch Up beskikbaar.
