Met sy blokkiesmaag en gespiere arms hardloop die aantreklike Liam (Abel Knobel) volspoed in Diepe Waters se Boskruin – en ons sitkamers – in. Ja, die eerste keer wat ons dié beroemde driekampatleet ontmoet, is sy hemp skoonveld terwyl hy in die park oefen.
“Ek is dalk nie ’n professionele atleet nie, maar nes Liam het ek nog altyd ’n groot passie vir oefen en sport,” vertel Abel (34). “Ek kon dus fisiek voorberei vir hierdie karakter wat my so na aan die hart lê.”
Maar hoe berei ’n mens voor om ’n professionele driekampatleet te vertolk?
Oefen, oefen en nogmaals oefen, laat Abel hoor. “Ek het twee keer ’n dag gim toe gegaan, ’n streng eetplan gevolg en self ernstig begin swem. In daardie twee maande voordat ek die eerste dag op die stel moes wees, het ek verskriklik hard geoefen,” deel hy.
En dis juis omdat hy Liam so geloofwaardig as moontlik wou uitbeeld dat hy so gedissiplineerd voorberei het.
Hoewel dit soms vreemd is om sonder ’n hemp op die kassie te verskyn, het sy rol in die wulpse Showmax-komediefliek Khaki Fever, wat verlede jaar uitgereik is, hom ook voorberei om meer gemaklik voor die kameras te raak, meen hy.
En oor Liam sê Abel: “Dit is die mees intense rol wat ek al ooit gespeel het. Die voorbereiding en uitdagings met Liam het my ’n nuwe vlak van ontdekking van myself en my akteurspel gegee. Die oomblik toe ek lees wat sy uitdagings is, wat sy storie is en wie hy is, het ek onmiddellik ’n gut feeling gehad dat hierdie karakter vir my geskryf is.”
Wie is Liam?
Van meet af kan kykers sien iets is vreemd aan dié energieke, dog vriendelike man wat uit die bloute in Boskruin opdaag. Hy praat vinnig, verloor konsentrasie in gesprekke en oefen só hard dat selfs die swemafrigters Gys (Justin Strydom) en René (Marijke Coetser) bekommerd raak.
“Nes Liam het ek ook ’n positiwiteit en lus vir die lewe. Maar Liam se energie kan soms mense oorweldig. Ek is baie meer bewus van hoe ek teenoor ander mense optree,” sê Abel, wat ook in TV-produksies soos Spoorloos, Die fakulteit en 7de Laan te sien was.
Hoe Liam se persoonlike ondekkingsreis gaan ontvou, kan Abel nog nie verklap nie. Maar dit stem wel baie ooreen met sy eie reis om homself beter te verstaan, gee hy toe. Vir tyd en wyl is Liam besig om die hele Boskruin plat te hardloop terwyl hy die traumas van sy geheimsinnige verlede probeer verwerk…
Om deel van die Diepe Waters-wêreld te word, was vir Abel ook ’n groot eer. Die span was behulpsaam en hy kon vinnig sy voete vind. “Ek en Marijke kom beide van Bethlehem af en het voorheen saam in ’n produksie gespeel. Selfs iemand soos Gys Swarts lyk altyd ernstig op TV, maar dan is Justin (Strydom) so saggeaard en lief vir al die mense om hom,” vertel Abel.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Diepe Waters is ook op Catch Up beskikbaar.
