Familiespanne van twee generasies veg vir die kroon as Kokkedoor: Son en See se vakansiekos-kampioene in die nuwe seisoen van Kokkedoor.
Vir die tiende seisoen van die reeks is daar ook twee nuwe beoordelaars, die gerekende koskenners Herman Lensing en Yolani Abrahams.
Donderdag 20 November 2025
Episode 1
Sommer met die intrapslag moet die familiespanne die geure raai van die ikoniese padkos-vleispasteie. Die huiskokke word ook uitgedaag om die familie met ‘n bord vakansiekos uit te beeld.
Donderdag 27 November 2025
Episode 2
Hertzoggie? Skurwejantjie? Lepelsteeltjie? Eers warm die Kokkedore geblinddoek hul bakspiere op, waarna hulle Andriette Georgiou van Mondvol moet beïndruk met kreatiewe opwip-strandkoekies.
Donderdag 4 Desember 2025
Episode 3
Die braaivure word aangesteek vir Kokkedoortjie-wenner Edwin Theron wat cordon bleu na ’n steakbraai toe bring. Die kokke tert vaal braaiterte op en maak vernuwende kampeerkos met flair.
Donderdag 11 Desember 2025
Episode 4
Terwyl onweerswolke opsteek takel die Kokkedore mekaar in ’n pannekoekresies met ’n yslike tydsvoordeel. Eenpot-geregte uit die dae voor die internet laat ’n jakkals los in die hoenderhok.
Donderdag 18 Desember 2025
Episode 5
Op Oukersaand roer ’n kinderkoortjie die hartsnare. Die Kokkedore deel egter nie almal dieselfde sentiment vir die tradisies van die Kerstafel nie, veral nie vrugtekoek en koekstruif nie.
Donderdag 25 Desember 2025
Episode 6
Die luukse kouevleis- en slaai van die Kerstafel word omskep in gourmet-toebroodjies, Die generasiespanne wys hul ware kleure met souttert en lagieslaai en Hannes van Wyk as piekniekgas.
Donderdag 1 Januarie 2026
Episode 7
Blikkiesvis en ’n pizza-oond kom tot die redding. Vir een span is die seekos-bord van Chef Reuben Riffel die uitdaging wat hul bootjie laat sink in die spanningsvolle semi-finale rondte.
Donderdag 8 Januarie 2026
Episode 8
Die familiespanne soek inspirasie in hul gunsteling partytjie-eras vir die Groot Opskop met 50 gaste in vrolike feesvere. Die beste nuwe-generasie oestafel bepaal die Goue Haan-wenspan.
Kokkedoor: Son & see begin op Donderdag 20 November om 20:00 op kykNET en DStv Stream (DStv-kanaal 144). Dié Kokkedoor-reeks sal ook op Catch Up beskikbaar wees.
