In Skemergrond vertolk Jandré le Roux die karakter van Genie Matthews, ’n charismatiese vermaaklikheidskunstenaar wat lank op skepe gewerk het. Sy onverwagte verskyning, het almal behoorlik op hol en dit is nie lank nie of sy sjarmante persoonlikheid doen sy ding.
Wie is Genie?
Genie is ’n ou wat maklik met mense oor die weg kom en wat beskermend teenoor sy vriende optree, veral Lily (Hildegardt Whites) en Amber Louw (Talia Davis), wat hy op die skepe ontmoet het.
Jandré beskryf Genie as “vriendelik, sjarmant, behulpsaam en vermaaklik” en sê dat sy benadering tot die karakter grootliks gegrond is op die idee om pret te hê met die rol, terwyl hy steeds ’n oortuigende vertolking lewer.
“Ek en Genie is dieselfde in terme van ons slag met mense. Ons kan met enigiemand ’n verhouding bou, en ons het albei ’n tipe sjarme. Ons hou daarvan om in ’n redelike goeie fisieke toestand te wees, speel albei kitaar en sing en skryf so nou en dan ’n liedjie,” sê hy.
En hoe verskil Jandré van Genie? “Ek dink Genie is so bietjie meer arrogant as Jandré.”
‘Ek’s mal oor hom’
Maar hy hou van Genie. “Ek’s mal oor hom en het dit ook al baie vir van die ander akteurs gesê. Genie is een van die lekkerste karakters wat ek nog gespeel het. Hy ‘sit’ net lekker by my, en op ’n manier connect ek met hom en verstaan hom. Ek kan regtig pret met dié karakter hê,” sê hy.
Die uitdagendste deel van dié rol vir Jandré is om dit so eg as moontlik te vertolk. “Ek moes myself vertrou dat ek genoeg gegee het om aan die karakter reg te laat geskied en hom lewe te gee op die manier wat ek, die skrywers, vervaardigers en regisseurs hom voorgestel het. Dit was ook moeilik om in karakter te bly en myself nie te vergaap aan my medespelers se absolute puik toneelspel nie. Almal gee hul uiterste bes en is ongelooflik.”
Jandré maak op Dinsdag, 24 Junie 2025, sy eerste buiging in Skemergrond. Die spanning loop dan omtrent hoog wanneer Ruan (Dann-Jaques Mouton) vir Genie ontmoet.
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
