Kykers van Diepe Waters word genooi om op Donderdag 25 Desember saam met die Boskruin-gemeenskap Kersfees te vier in ’n spesiale Kersfees-episode. In dié episode word ’n intieme Kerskonsert in Gys (Justin Strydom) se tuin gehou, met verskeie geliefde karakters wat hul sangtalente ten toon stel – só ook die Afrikaanse sanger en akteur Bobby van Jaarsveld.
Sing saam
Die konsert word geopen met Rossouw (Altus Theart) se weergawe van “Lofsing die Heer”. Soos die son sak en die liggies begin skitter, bring Pam (Tracey-Lee Oliver) warmte en feestelikheid met Vanessa Williams se weergawe van “Hark the Herald Angels Sing”. Daarna raak Lettie (Stephanie Baartman) en Henry (Stiaan Bruwer) aan die hartsnare met “Ave Maria”.
Stephanie sê oor dié duet: “Dit is in die eerste plek altyd besonders om saam met Stiaan te sing, omdat ons mekaar op persoonlike en musikale vlak een honderd persent verstaan. Tweedens is die lied beslis vir my spesiaal, omdat dit direk tot Maria, Jesus se Moeder, spreek. Sy is ’n sentrale figuur in die hele Kersverhaal wat soms oorgesien word, so ek is dankbaar dat ons die eer aan haar kon bring met hierdie lied.”
Min kykers weet dat Karla (Daniélle Swanepoel) en Arno (Jean Henry) ook kan sing – en hul vertolking van “In die velde dig by Bethlehem” verras en bekoor.
Spesiale gas
Die hoogtepunt van die aand volg wanneer Bobby van Jaarsveld ’n besondere weergawe van “Stille Nag” sing, gevolg deur “Kyk hoe glinster die maan”.
Oor “Stille Nag” sê Bobby: “Dis asof jou menswees net stil raak sodra jy die lied hoor… Ja, uit respek uit, maar ook uit ’n plek van herinnering. Dis iets wat jy onthou wat jou altyd sal terugvat na ’n spesiale tyd saam jou geliefdes.”
En dan…
Maar soos dit Diepe Waters betaam, hou die aand ook ’n onverwagse reünie in… sonder om te veel te verklap!
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Diepe Waters is ook op Catch Up beskikbaar. Kyk ook S1-3 van Diepe Waters op Showmax.
