Die Mosotho-drama, This is Not a Burial, It’s a Resurrection, met die wyle, en ikoniese aktrise Mary Twala in ’n boeiende hoofrol, is een van daai flieks wat in die “verpligtend-om-te-kyk”-kategorie val.
Die prent se skrywer-regisseur, Lemohang Jeremiah Mosese, is self-opgelei en dís sy natuurlike aanvoeling en kreatiewe vindingrykheid wat die storie vorentoe dryf.
Nie hy of die storie buig voor konvensionele maniere om stories te vertel nie – Mosese het sy eie pad gekerf en sy eie filmiese taal geskep om hierdie spookagtige verhaal oor die verlede – en vooruitgang – te skep. Die vertelling volg Mantoa (Twala), ’n 80-jarige weduwee, wat ’n nuwe sin van doelgerigtheid en passie vind as haar gemeenskap deur ’n damontwikkeling bedreig word. .
Die fliek is in wese ’n dekonstruksie van ’n begrafnis en ondersoek temas rondom erfenis, nalatenskap en godsdiens. Daar is ook ryk sosio-politieke ondertone wat tydige Afrika-narratiewe oor imperialisme en grondbesit met sorg verweef.
Twala, in haar finale vertoning voor haar dood, verleen selfs meer diepte, en is een van verskeie uitstekende rolverdelingkeuses. Terwyl sy in byna elke raam van haar swanesang pryk, word Twala ook ondersteun deur spelers soos Jerry Mofokeng en Makhaola Ndebele.
Mosese kweek ’n donker, ontnugterende atmosfeer en tesame met sy gebruik van klank, herinner dit aan die werk van die legendariese filmmaker David Lynch. In dié surrealistiese atmosfeer laat Mosese spookagtige tonele toe om soos skilderye te ontvou. This Is Not A Burial, It’s A Resurrection is pragtig verfilm, en die deurdagte komposisie en hipnotiserende beelde resoneer met die afgryse van Robert Eggers.
Die storievertelling is deurspek met poësie en kragtige kontraste, wat die dialoog toelaat om die anderwêreldse gevoel van Mosese se wêreld aan te vul, asook af te dwing. Teen die agtergrond van Lesotho se natuurlike skoonheid verdiep This Is Not A Burial, It’s A Resurrection hom in die land se ryk kultuur en erfenis.
Die drama is uiteindelik gekies as Lesotho se eerste beste internasionale rolprent-voorlegging by die 93ste Oscar-toekennings.
Kyk nou dié reeds bekroonde fliek op Showmax.
