“Styl gaan oor veel meer as net klere,” sê Bravo!-aanbieder Ewan Strydom. “Dis hoe jy praat, beweeg, leef, onthaal en jouself onberispelik uitleef. Dis die hele pakket – die soort vrou wat ander inspireer deur haar outentieke teenwoordigheid.”
Volgens Ewan is die vroue wat as die Bravo! Revlon Stylikoon benoem gaan word nie noodwendig voltyds in die kollig en alombekend nie. Hulle is wel in die openbare oog en besig om hul merk op die wêreld te laat – met styl.
Die keuringsproses is nou in volle swang en kykNET het ’n paneel van gerekende kenners saamgestel om vier finaliste uit verskeie benoemings te kies.
Die paneel
Die paneel bestaan uit ’n uiteenlopende groep foendies:
- Jo-Ann Strauss – voormalige Mej. Suid-Afrika en sakevrou
- Fanie Cronjé – SARIE-stylredakteur en modekenner
- Lucilla Booyzen – stigter van SA Modeweek
- Jackie Burger – voormalige Elle-redakteur
- Heather Goate – bemarkingsredakteur van Revlon
- Desiree Tan – kykNET se toesigvervaardiger van Bravo!
- Paul Venter – vervaardiger van Bravo!
Die eerste groot stap op hierdie reis het Dinsdag tydens ’n paneelgesprek plaasgevind waar die beoordelaars hul eerste insae gehad het oor wie die potensiaal het om as dié stylikoon gekroon te word.
“Ons sien uit daarna om die stories van hierdie dinamiese vroue te deel,” sê Ewan. “Elke insetsel wat ons oor die volgende paar maande gaan bring, bied kykers ’n insig in die lewe en styl van die vier finaliste. Van hoe hulle aantrek tot hoe hulle hulself grimeer, en natuurlik hoe hulle hul unieke styl in die wêreld uitdra.”
Reis ook op TV uitgesaai
Die vier finaliste sal in afsonderlike episodes van Bravo!, wat op Donderdae om 21:00 op kykNET en DStv Stream (DStv-kanaal 144) uitsaai, op die volgende episodes bekendgemaak word: 24 Julie, 21 Augustus, 18 September en 16 Oktober. Die wenner sal tydens ’n glansgeleentheid in Kaapstad op 13 November aangekondig word.
“Ons droom is dat hierdie projek sal groei tot ’n jaarlikse instelling met meer kategorieë,” sê Ewan. “Dis tyd dat ons vroue wat met styl en dryfkrag leef, behoorlik vier.”
