Tien boere, ’n nuwe aanbieder en die moontlikheid van ’n liefde wat ’n leeftyd hou: Boer soek ’n vrou se 19de seisoen begin met ’n uitnodiging aan voornemende pasmaats om die eerste tree te gee.
Christiaan (27) bedryf ’n gemengde boerdery by Clocolan in die Vrystaat. Dié kykNET-maatsoekreeks gee hom die kans om iemand te ontmoet wat saam met hom vorentoe wil kyk.
Christiaan se liefde vir die plaas strek van antieke trekkers en enjins tot die oop ruimtes waar hy graag jag, visvang en motorfiets ry. Hy is hardwerkend, weet waarheen hy op pad is en probeer die positiewe in elke situasie raaksien. Familie en vriende is vir hom kosbaar, en dit is hom belangrik om betrokke in sy gemeenskap te wees.
Hy hoop om iemand te ontmoet met wie hy sy lewe en toekoms kan deel: ’n meisie met ’n sterk geloof en goeie waardes, een wat die plaas en natuur liefhet en saam met hom uitdagings sal aanpak.
As jy ook die plaaslewe liefhet en waarde heg aan geloof en saamstaan, kan jou brief die eerste tree wees om Christiaan te leer ken.
Skryf só in
- Besoek www.kyknet.tv.
- Bel die vervaardigers, Wolflight, by 079 614 2229.
- Stuur ’n e-pos na: boer@wolflightsa.com
- Stuur ’n brief of pakkie na Boer soek ’n vrou, Coronation-laan 11, Somerset-Wes 7130.
- Voornemende pasmaats kan tot middernag op 27 November 2026 vir die boere skryf.
