Menu terloops
In Gons [8 Nov 2023]

‘Boer soek ’n vrou’: Boer Sanel deins nie terug vir enige uitdaging nie


Sanel het vir ‘Boer soek ’n vrou’ ingeskryf op soek na iemand wat haar kan aanvaar vir die mens wat sy is.

‘Boer soek ’n vrou’: Boer Sanel deins nie terug vir enige uitdaging nie

Boer Sanel, ’n 39-jarige boer van Dwaalboom in Limpopo, is een van die tien boere wat liefde in die 16de seisoen van kykNET se maatsoekreeks Boer soek ’n vrou wil vind.

Sanel boer met beeste, maar sy het ook wild op haar plaas, met jagters wat gereeld besoek aflê. Sy self jag al van haar skooldae af. Sy sê sy dink haar liefde vir boerdery kom van haar oupa af, wat ook daar geboer het, en veral haar beesboerdery lê haar baie na aan die hart.

Van haar trotsste oomblikke is wanneer haar kalwers op ’n veiling kom en mense dit onmiddellik eien as komende van haar plaas omdat sy haar stoetbulle sorgvuldig kies vir vorm en vleis.  

Altyd reg vir ’n uitdaging

Haar groot liefde vir diere kom al van kleintyd. En sy sê sy het waarskynlik meer geduld met diere as met haar vier kinders (drie seuns en ’n dogter). Hulle beweer glo hul ma kla en dat sy baie kwaai is. Sanel erken skottelgoedwas is een van haar swakste eienskappe. 

Daarteenoor beskryf sy haarself as lewenslustig, dapper en liefdevol.

Sanel boer met beeste, maar sy het ook wild op haar plaas. Foto: Verskaf

Sanel het al baie harde lesse in die lewe geleer en wat sy daaruit geneem het, is dat jy al jou liefde moet gee sonder om te veel in ruil daarvoor te verwag. “Die lewe is kort, en God is in beheer.”

Sanel vertel ook sy het baie vriende. 

“Jy gaan altyd weet as ek by ’n plek instap, want ek is loud en altyd reg vir ’n uitdaging,” lag sy.

Sanel glo sy het alles in die lewe bereik wat sy wou, maar nou kort daar een ding – ’n lewensmaat. Sy het drie jaar gelede haar man, Driekus, met wie sy 15 jaar lank getroud was, aan Covid verloor.

Sy vertel dat haar seun, Driekus, na sy pa aard. HW is haar ysterseun wat al kanker oorwin het en alhoewel Wessel nie gek oor skool is nie, is beeste en boer beslis in sy bloed. Suné was haar pa se blom, volgens Sanel.

Hoe lyk haar ideale pasmaat?

Sanel soek iemand wat haar kan aanvaar vir die mens wat sy is. “Ek is nie regtig op soek na ’n pa vir my kinders nie. Ek voel hulle het hul pa gehad. Maar liefde en ondersteuning is vir hulle baie belangrik.”

Uit haar verhouding met Driekus het sy ook baie geleer. Hulle het in matriek ontmoet, ses maande later oor die telefoon verloof geraak en September voor die kansel gestaan.

“Ek het saam met hom deur die lewe gegroei, en hy het my baie geleer. Een daarvan was om kos te maak. Ek sal nooit weer iemand soos hy kry nie, maar ek hoop om iemand te kry wat vir my lief kan wees soos wat hy was.”

Hoe voel Sanel oor romanse?

“Jy het nie altyd geld nodig om iemand uit te vat nie. Ek bedoel, ’n kombers en ’n piekniekmandjie net daar in die ope lug, of agterop die bakkie om net na die sterre te kyk en na mekaar te luister – daai kan vir my die ultimate wees.”

Haar ideale man se fondasie moet reg wees in die sin dat hy moet weet die Here het almal geskape.

“Hy moet gevestig wees in sy lewe, sy man kan staan en met die regte intensies kom om my hart te wen en om hier te wees vir my.”

Wil jy vir ’n boer skryf?

Persone wat die boere beter wil leer ken, kan dit op een van die volgende maniere doen: 

  • Skryf in op kykNET se webtuiste by www.kyknet.tv.
  • Besoek die boere se profiele op die Afrikaanse maatsoek-app, KOER.
  • Bel die vervaardigers, Wolflight, by 079 614 2229.
  • Stuur ’n e-pos na boer@wolflightsa.com.
  • Die sluitingsdatum vir briewe is teen middernag op 30 November 2023.

Wanneer is dit op die kassie?

Marciel Hopkins bied vir ’n vierde keer Boer soek ’n vrou aan. Dié maatsoekreeks sal van Julie 2024 op kykNET en DStv Stream (kanaal 144) uitgesaai word. Kykers sal dan die boere se liefdesreise kan volg, en die reeks, wat uit 13 episodes bestaan, sal oudergewoonte fokus op die vyf boere wat die meeste briewe ontvang het.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

Wat om te kyk: ‘The Whale’, ‘No Hard Feelings’, ‘Lover, Stalker, Killer’ (ril!) en meer

Dié week se TV-gids sluit in een van die snaakste flieks van 2023, ’n ware misdaaddokkie wat jou twee keer gaan laat dink oor online dating en Brendan Fraser se Oscar-bekroonde vertolking in 'The Whale'. Lees verder vir ons keur van vandeesweek se beste keuses, aanlyn en op TV.

Meer

‘Op my eish!’ met Brendan Peyper: 9 goed wat jy ná episode 4 se wilde ompad moet weet

Ai, ná verlede week se warm soen, het ons gedink die sanger Brendan Peyper gaan vandeesweek groot moves maak. Helaas, dit was eerder sy ouma wat wat toe met "vars bloed" in die vroue se slaai kom krap het...

Meer

Redakteurskeuse vir Februarie 2024: Mode, manewales, en Messi

Wat om te kyk: ’n Besonderse dokkie oor die legendariese sokkerenigma, Lionel Messi; ’n reeks oor hoe moderne mode tydens die Tweede Wêreldoorlog gestalte gevind het; en die nuwe Showmax se propvol kykspyskaart wat ikoniese reekse soos ‘The Office’ en ‘Parks & Recreation’ insluit – hier is ons keur van TV-vermaak vir vandeesmaand se redakteurskeuse.

Meer

Wat om te kyk: Reeksmoordenaars, rugby en roerende drama

Wat om te kyk: 'Donkerbos' is uiteindelik ook beskikbaar vir DStv-kykers; skouspelagtige rugby én agter-die-skerms-drama in ’n Sesnasies-dokkie; M-Net se nuwe gesinsdrama, 'Summertide', première, en ’n epiese oorlogsdrama wag in Steven Spielberg se 'Masters of the Air'. Lees verder vir ons keur van vandeesweek se beste keuses, aanlyn en op TV.

Meer
Sien alle opsies