Daandré, ’n 26-jarige boer van Brits, is een van die tien boere wat liefde in die 16de seisoen van kykNET se maatsoekreeks Boer soek ’n vrou wil vind.
In die 15de seisoen het hy net-net die toptien misgeloop – iets waaroor hy vandag bly is omdat baie dinge in daardie tyd gebeur het wat sy aandag te veel in beslag geneem het. Maar vanjaar is die jaar vir dié groenteboer van Noordwes.
“Ek vertrou op die Here dat die tyd reg is vir my om my trouvrou te ontmoet, want die alleen is nie meer lekker nie.”
Daandré en sy familie woon al 21 jaar op die plaas, en hy sê sy liefde vir boer kom van sy pa en oupa af. Dis ’n familieboerdery, wat aan sy pa en oom behoort, en hy en sy broer is ook hierby betrokke.
Soeke na balans
Hy is verantwoordelik vir die pakhuis, bemarking en aankope van produkte wat deur die pakhuis moet gaan, maar hy erken die ure op die plaas maak hom moedeloos.
Seisoentyd beteken groot druk op die pakhuis, maar dis vir hom belangrik om balans tussen werk en vrye tyd te handhaaf.
“Jy kan nie net werk, werk en werk nie,” sê dié donkerkop.
Gelukkig is daar vrye tyd waartydens hy staproetes doen, bergfietsrenne ry, kampeer en reis. Tussendeur erken Daandré dat hy by tye té eerlik kan wees. En wanneer iemand hom omkrap, is hy geneig om te onttrek. Hy krop ook soms sy emosies op omdat hy nie van konflik hou nie. Hy glo wel hy is ’n baie lojale mens wat reguit praat, en hy beskik oor hope dryfkrag wanneer hy iets aanpak.
Ongeveer drie jaar gelede het ’n nuwe belangstelling in plante wortel geskiet en het hy sy liefde vir broodbome ontdek. Nadat hy sy eerste saailinge geplant het, is hy behoorlik deur die broodboomgogga gebyt en gaan sy kwekery net van krag tot krag.
“Ek het ’n groot liefde vir die Here. My passie is daarin, en veral onder die jeug,” en daarom moet sy ideale vrou ook daardie liefde deel.
Hoe lyk sy ideale pasmaat?
“Ek het nie baie meisies in die verlede gehad nie. Ek kan hulle waarskynlik op my een hand tel. Party mense sien dit as ’n slegte ding, want jy het nie ervaring opgedoen nie. Maar in my oë – hoekom moet jy ervaring opdoen om liefde te vind? As jy regtig weet wat jy soek, gaan sy oor jou paadjie kom.”
Daandré sê al hy het nie ’n verhoudingsgeskiedenis nie en al was hy nog nooit in ’n vaste of “Facebook Official”-verhouding nie, is hy wel romanties. Vir hom is dit ’n piekniek vir twee by kerslig langs die dam onder die maanlig.
Maar hoe weet jy dis die regte een?
“Elkeen het ’n ander ervaring, en dit hang af waar jou geloofvlak lê. Ek soek iemand met goeie familiewaardes en ’n sterk geloofagtergrond. ’n Mens help bou aan mekaar se geloof.”
Daandré draai ook nie doekies om nie. As hy die regte vrou vind, gaan daar kort voor lank voor die kansel gestaan word, en binne vyf jaar sal daar ook hopelik twee kinders wees.
“Daar’s soveel goed wat ek wil doen, plekke wat ek wil sien, maar ek wil dit nie alleen doen nie. Ek wil dit share met iemand special. Jy kan nie die vreugde van sulke dinge alleen ervaar nie.”
Wil jy vir ’n boer skryf?
Persone wat die boere beter wil leer ken, kan dit op een van die volgende maniere doen:
- Skryf in op kykNET se webtuiste by www.kyknet.tv.
- Besoek die boere se profiele op die Afrikaanse maatsoek-app, KOER.
- Bel die vervaardigers, Wolflight, by 079 614 2229.
- Stuur ’n e-pos na boer@wolflightsa.com.
- Die sluitingsdatum vir briewe is teen middernag op 30 November 2023.
Wanneer is dit op die kassie
Marciel Hopkins bied vir ’n vierde keer Boer soek ’n vrou aan, en dié maatsoekreeks sal van Julie 2024 op kykNET en DStv Stream (kanaal 144) uitgesaai word. Kykers sal dan die boere se liefdesreis kan volg, en die reeks, wat uit 13 episodes bestaan, sal oudergewoonte fokus op die vyf boere wat die meeste briewe ontvang het.
