Alles Malan, vervaardig deur Red Letter Day Pictures, begin as ’n tipiese coming-home verhaal as Frik, sy vrou, Tessa, hul tienerdogter en aangenome seun uit Engeland na tuisbodem in die Paarl terugkeer. Dis nie ’n…sal ons sê…maklike aanpassing vir enigiemand nie.
Frik moet die gesin se vervoeronderneming, waar sy jonger broer, Nico, ook werk, by sy pa oorneem. Nico droom steeds van ’n rugbyloopbaan (heel onrealisties, ongelukkig) en gaan al jare met die plaaslike hoërskool se drama-onderwyser, Lee-Anne uit, maar van ’n ring is daar nie sprake nie. Lee-Anne is ’n liefdevolle mens-mens, maar sukkel om haar eie stem te vind en is geneig om ander se behoeftes bo haar eie te stel. Tessa is ’n prokureur, maar haar toekomsplanne is onseker ná die trek. Dit terwyl Tessa en Frik se dogter Elani ’n geheim wegsteek en hul seun, Freek, sukkel om sy plek in die wêreld te vind.
Alles Malan is geskoei op die realiteite van die alledaags: elke gesin het hul geheime, kry swaar en kan lekker baklei, maar dis deel van wat die lewe die moeite werd maak.
