Die eerste oorspronklike Netflix-reeks vir en deur Suid-Afrikaners, Queen Sono, sou aanvanklik ’n tweede seisoen kry, maar Covid-19 het die verfilming in die wiele gery. Dis ’n groot jammerte, want die reeks, met die aktrise Pearl Thusi in die hoofrol as Queen Sono, is volop intrige en aksiebelaai.
Queen Sono is ’n spioen vir ’n geheime regeringsorganisasie en die reeks begin met haar raison d’etre vir dié gevaarlike beroep. Dis die herdenking van haar ma, ’n vryheidsvegter se dood. Safiya Sono is vermoedelik deur pro-apartheid skurke vermoor en die reeks draai om Queen se pogings om die waarheid oor haar ma se moord uit te krap. Intussen moet sy ook met misdadigers afreken wat die land, en soms ook die kontinent, bedreig.
’n Bonus is die klomp verskillende Suid-Afrikaanse tale wat gebruik word.
Buiten Thusi, is Rob van Vuuren, Loyiso Madinga en selfs Frank Opperman, in die reeks te sien.
