Ons sepievoorskou vertel jou meer oor waarna jy hierdie week (27 tot 31 Oktober) in Suidooster, Skemergrond en Binnelanders kan uitsien.
Suidooster
Nadat Maryam (Celeste Wannenburgh) in Ruiterbosch verlede week aangekom het, maak sy die lewe vir arme Mymoena (Jill Levenberg) baie moeilik. Ek sal enigiets vir my suster doen, maar as sy haarself só gedra het sou ek ook ongelukkig vir haar die deur moes wys. Dit is nie net Maryam se aksies wat my bloed laat koek nie, dit is haar hele fake persoonlikheid. Asof die musiekboksie nie genoeg was nie, trap sy heeltemal oor die lyn hierdie week danksy haar jaloesie. Maryam vind ook vinnig uit Bridget is nie Moena nie.
Maar die Samsodien-moles is niks in vergelyking met die Brassery-ongelukkigheid nie. Die eienaars van Brassery is allesbehalwe brasse, wat nog te sê van lovers, hierdie week. Dinge raak nogal erg ongemaklik danksy daai power move en ’n foto of twee. Wat vir hulle ongemaklik is, is bingeworthy-kykstof vir kykers. Dit is asof jy die motorongeluk sien aankom, maar net nie kan wegkyk nie. Hoekom voel dit vir my asof Wangie dalk weer ’n comeback gaan maak…?
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up, DStv Stream en Showmax.
Binnelanders
Ek was regtig aan Delia (Odelle de Wet) se kant en wou so graag in haar nuwe persona geglo het, maar nes ’n luiperd nie sy kolle kan verander nie, is Delia dalk net so slinks soos wat sy nog altyd was. En al wil ek nou weer in haar keel afspring, is dit maar seker die Kosters se verdiende loon vir hoe hulle haar hele CEO-debakel hanteer het. Dit wys jou net weereens jy kan nie saam met ’n geliefde besigheid doen nie – dit eindig net nie goed nie.
Maar soms word Delia ook onkant gevang. Soos wanneer sy hierdie week die nuutste dokter by Binneland-kliniek ontmoet. Ek weet nie wie groter geskrik het nie: Delia of Ella (Marlee van der Merwe)? Hoekom voel dit vir my Ella het nou weer ’n geheime geskiedenis met hierdie skurk wat haar hele lewe gaan omvergooi?
Binnelanders word vanaf Maandag tot Vrydag om 19:30 op kykNET en DStv Stream (DStv-kanaal 144) uitgesaai.
Skemergond
Christine (Devonecia Swarts) het regtig gedink daai een goeie daad hierdie week gaan mense skielik laat vergeet van haar vyandige aksies oor die afgelope paar maande. Ek raak mos kinderlik opgewonde wanneer een van Christine se planne so in haar gesig opblaas. Hierdie een was ’n bietjie meer persoonlik en selfs ek het haar jammer gekry toe Patty (Gretchen Ramsden) die pleister afruk. Ek wonder wat sy nou gaan doen?
Het nooit gedink ek sou dit sê nie, maar lyk my die een suster is so sleg soos die ander… Hazel (Carmen Maarman) sal vinnig moet kies!
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
