Menu terloops
In Gons [3 Sep 2025]

‘My f*k, Marelize!’ skiet na nommer 1


‘My f*k, Marelize!’ het die top-posisie by die Suid-Afrikaanse loket (en in Namibië) tydens sy openingsnaweek verower.

‘My f*k, Marelize!’ skiet na nommer 1
Kyk lokprent

Die Afrikaanse film My f*k, Marelize! het oor die naweek die ligte uitgeskiet by die loket en daarmee die boonste sport op die Suid-Afrikaanse toptien bereik. En dít ten spyte van strawwe internasionale kompetisie in The Roses, Caught Stealing en Afterburn wat tans ook op die kringloop is. 

Dit is die eerste Afrikaanse rolprent wat weer op nommer een open sedert Ivan Botha en Donnalee Roberts se reusetreffer Pad na jou hart (2014).

Dié rolprent het by die onlangse Silwerskermfees première.

Oor die naweek het dit 24% van die inkomste wat die toptienflieks by die loket verdien het, ingebring. In Namibië – waar dit verfilm is – was die fliek vir 6,3% van die naweek se algehele loket-opbrengs verantwoordelik. Dít is ’n nuwe rekord in Namibië vir die persentasie wat ’n Afrikaanse rolprent in die openingsnaweek verdien het.

In vergelyking met ander Afrikaanse trefferflieks het Marelize, in terme van die openingsnaweekverdienste, 89% beter as verlede jaar se Die Kwiksilwers by die loket gevaar.

My f*k, Marelize! is gegrond op ’n ware verhaal van ’n viral video wat ’n nasie geïnspireer en ’n uitdrukking in die volksmond geword het. Dis ’n coming of age-film wat gaan oor Heidi, ’n vrou met verbete wilskrag wat haar kanker vir haar familie wegsteek, en Marelize, haar ongeluksvoël-dogter wat moet leer fietsry om as au pair in Nederland te gaan werk.

Meer as R1 miljoen by loket

My fok marelize
Zandélle Meyer (Suidooster, Wyfie) vertolk die naamrol in My f*k, Marelize! Foto: Verskaf

“Die film het nou al meer as R1 miljoen by die loket verdien. Dít is geen geringe prestasie nie en veral noemenswaardig in die huidige klimaat,” sê Nicola Auret, MultiChoice se uitvoerende hoof van programsamestelling. “Ons is verheug oor die loketsukses van My f*k, Marelize! in die openingsnaweek. Ons is baie trots op hierdie film en dankbaar vir die samewerking van die Namibiese filmbedryf en mense om dit moontlik te maak. ’n Plaaslike speelfilm wat nommer een by die loket is, is uitstekende nuus vir die plaaslike filmbedryf.”

My f*k, Marelize! is geskryf deur Brett Michael Innes (Khaki Fever, Sink, Fiela se kind). Zandré Coetzer (Mooiweer en warm, Dinge van ’n kind) het die regie behartig. Marelize is haar debuut as speelfilmregisseur.

Oor die sukses van die film se openingsnaweek sê Zandré sy is oorstelp van vreugde. “Dit wys weer dat opregte stories saak maak en dat gehore positief reageer op alledaagse mense wat buitengewone dinge doen.” (Lees ook ons onderhoud met Zandré oor die fliek.)

Die hoofrolle in My f*k, Marelize! word vertolk deur  Namibies-gebore Je-ani Swiegelaar (Binnelanders, Pad na jou hart, Vuil wasgoed), Zandélle Meyer (Suidooster, Wyfie), Neels Clasen (Spoorloos: Losprys, Raaiselkind) en Nichola Viviers (Nuwejaar, Meisiekind).

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

kykNET se nuwe mini-dramareeks is ’n verhaal van verlies, vergifnis en hoop

Twee mans se paaie kruis in ’n ondersteuningsgroep ná die verlies van geliefdes. kykNET se 'Elke donker wolk' verken hoe ’n onverwagse vriendskap ruimte skep vir vergifnis, genesing en hoop.

Meer

Rubriek: Gaan griffel in Ouma se resepteboek! ‘Kokkedoor: Klassiek’ is terug! 

Ná ’n voorskou van die eerste episode laat 'Kokkedoor: Klassiek' vir Marteni Burger verlang na haar ouma se resepte én sien sy uit na nog skeppies nostalgie - met ’n knippie kombuisdrama en verrassende kinkels daarby.

Meer

Van die veld tot die kelder – kuier dié November saam met VIA

Van wildplase en wynkelders tot huise met karakter: VIA se November-aanbod beloof vars ontdekkings. Kuier saam met Shari Kennedy, Leandie du Randt, Frank Rautenbach en JP Quickelberge, en leer ken die mense, stories en plekke wat Suid-Afrika so besonders maak.

Meer

Chanél Muller oor ‘Sy, die meeue en die Heilige Gees’

"Enige persoon se geloofsreis is ’n baie persoonlike reis, en dit gebeur alles baie innerlik", sê Chanel Muller, die skrywer, regisseur en vervaardiger van die kykNET-reeks 'Sy, die meeue en die Heilige Gees'.

Meer
Sien alle opsies