Soos met die vele ander Real Housewives-iterasies (waarvan kykers en meme-makers oënskynlik nie genoeg van kan kry nie) word hoogdrama, lang naels, rugstekery (met einste lang naels) en bekgevegte onder die ses vroue van Pretoria verwag.
Luidens ’n persverklaring is “luukse voertuie, manjifieke herehuise, ontwerpersklere, buitensporige partytjies en die duurste diamante” als deel van die reeks. Meng ’n bietjie Botox, ’n Zanzibar-vakansie en hiënas in en jy het vir jou ’n gemiddelde Dinsdag in Pretoors.
Volgens Waldimar Pelser, hoof van die kykNET-kanale, hoop hulle om vir kykers ’n groep “sterk Afrikaanse vroue uit Pretoria te wys wat ook groot spelers is in hul gesinne én gemeenskappe, wat eg Afrikaans is, en wat natuurlik ook die swier bring waarvoor Real Housewives bekend is. Hierdie vroue lewe gróót. Hulle ken die mooi dinge in die lewe.”
Die Real Housewives van Pretoria is die vyfde weergawe van die Real Housewives-formaat in Afrika. Die ander sluit Johannesburg, Durban, Lagos en Kaapstad in. Die formaat word internasionaal deur NBCUniversal Formats versprei en het al talle toekennings opgeraap.
Die Real Housewives van Pretoria saai vanaf 13 Oktober om 20:00 op kykNET (DStv-kanaal 144) uit en sal gelyktydig op Showmax beskikbaar wees. Die reeks bestaan uit 13 episodes.
Hier is ook ’n kort kykgids om met van die ander housewives wat tans op die kassie is, vertroud te raak.
- The Real Housewives of Lagos S1 op Showmax
- The Real Housewives of Durban S1 & S2 op Showmax
- The Real Housewives of Johannesburg S1 op Showmax
- The Real Housewives of Cape Town S1 op DStv Online/Catch Up
- The Real Housewives of Atlanta op DStv Online/Catch Up
- The Real Housewives of Dubai op DStv Online/Catch Up
- The Real Housewives: Ultimate Girls Trip op DStv Online/ Catch Up
