Vampire Academy is gegrond op die topverkoper-boeke uit die pen van die bekroonde skrywer Richelle Mead. Dit volg ook op die gelyknamige 2014-fliek.
Die reeks is na TV-formaat verwerk en ontwikkel deur die TV-skepper Julie Plec. Plec is bekend vir haar werk op die immergewilde tiener-smartsaga-dramareeks, The Vampire Diaries, asook sy spin-offs, The Originals en Legacies.
Die reeks se kreatiewe benadering is ook anders as dié van die fliek wat slegs een van die boeke as bronmateriaal en inspirasie gebruik het. Vir die TV-weergawe word al ses boeke in die reeks tesame as inspirasie vir die grondslag gebruik vir nuwe storielyne. Die storie draai egter steeds om Lissa en Rose en hul wedervaringe aan ’n spesiale kosskool. Daar moet Lissa leer hoe om ’n koninklike vampier te wees, en Rose word as haar beskermer opgelei. Saam-saam moet hulle die ins and outs van skoolpolitiek, liefde en magic aan St. Vladimir’s Academy navigeer terwyl hulle ook teen die bloedddorstige strigoi te staan kom.
Paste Magazine skryf dat Vampire Academy dit regkry om ’n reeks te skep wat ligte politieke drama met die meer klassieke kenmerke van ’n supernatural tienerdrama te vermeng om só intrige en raaisels te skep.
Twee episodes word weekliks, vanaf Vrydag, 19 Mei 2023, op Showmax beskikbaar gestel.
