Mindy Kaling, wat as ’n skrywer en akteur in die Amerikaanse weergawe van The Office haar voet in die baie mededingende TV-komediewêreld se deur gekry het, is tans on a roll. Haar mees onlangse TV-skeppings sluit in die uiters gewilde Never Have I Ever (op Netflix) en The Sex Lives of College Girls op HBO (plaaslik op Showmax).
Rozanne Els skryf in haar resensie:
“Dis nie net pittige (en o, dis uiters pittig) one-liners wat jou laat skater nie. Dis die inweef van onse harde, wrede, belaglike, soms absurd, soms ongelooflike alledaagse wees wat die grappe verhef. Dís standaard-praktyk in ’n Kaling-skepping, en so ook dan met The Sex Lives of College Girls.
Die reeks gee vier eerstejaarstudente se ervarings op universiteit met vermaaklike deernis weer. Of dit nou akademiese en finansiële druk is, eerste liefde, seks-positiwiteit, seksuele teistering, die soeke na self… Áls so eg en relevant en tematies ernstig. In iemand anders se hande sou dié reeks clichè kon wees, selfs ’n bietjie cringe. Kaling se karakters en hul stories is egter allesbehalwe.”
Die reeks se derde seisoen het vroeër vanjaar ten einde geloop, maar aanhangers wag nog geduldig om te hoor of daar ’n vierde seisoen gaan wees.
Al drie seisoene is nou op Showmax beskikbaar om te stroom.
