Ná sy groot sukses in die vorige seisoen is Mickey (Manuel Garcia-Rulfo) se regspraktyk – met hom wat meerderheid van sy werk van vanuit die agterste sitplek van sy Lincoln doen, eerder as sy kantoor – in hoë aanvraag.
Mickey en sy chauffeur Izzy Letts (Jazz Raycole) kan in die reeks gesien word in ’n steenkoolkleurige 2019 Navigator met die spesiale nommerplaat “DISMISSD”. Of in sy blou 1963 Lincoln Continental-afslaandak met ’n “NTGUILTY”-nommerplaat. Maar Mickey skuif ook sélf gereeld agter die stuur van die motors in.
In die tweede seisoen kruis Mickey se paaie met dié van ’n vrou wat dan sommer gou ’n kliënt word as sy van moord beskuldig word. Maar wie die vrou is, word nog dig geheim gehou tot waar die reeks begin.
Dié reeks, een van Netflix se gewildste, is gegrond op die topverkoperboeke deur Michael Connelly. Die tweede seisoen is dan juis op die vierde boek van Connelly se The Lincoln Lawyer-reeks, The Fifth Witness, gegrond. Dié boek is terloops Connelly se 23ste boek wat die lig gesien het.
Wat dalk ook bygedra het tot die reeks se sukses is dat die bekroonde veteraan TV-skepper, David E Kelley, ook hier as skepper dien. Kelley is bekend vir sy regsdramas, waaronder Boston Legal, The Practice, en Ally McBeal.
Ook onder die rolverdeling tel Neve Campbell, Becki Newton, Jazz Raycole en Angus Sampson.
Springmieliefeite
Aanhangers van die fliek, The Lincoln Lawyer (2011), het natuurlik gehoop dat Matthew McConaughey, wat die hoofrol in die fliek vertolk het, ook vir die reeks ingespan sou word.
Manuel Garcia-Rulfo was nie Netflix se aanvanklike keuse om die rol van Mickey Haller te vertolk nie. Logan Marshall-Green (24, The O.C.) was glo die aangewese kandidaat. Maar toe tree die wêreldwye pandemie in en veroorsaak produksieprobleme.
Eind goed, als goed in soverre dit die netwerk en Garcia-Rulfo betref. Dit was asof hy vir die rol gemaak was. Sy eie herkoms het ook ’n rol gespeel want hy is van Mexikaanse afkoms en sy ma Latyns-Amerikaans. Connolly het hom as die ideale persoon beskryf om die karakter van Micky te vertolk omdat hy getrou aan die boekkarakter sou bly.
Vanaf Donderdag 6 Julie 2023 op Netflix. Deel 2 sal op 3 Augustus 2023 volg.
Kry Netflix met DStv
DStv-intekenare kan met die nuwe Explora Ultra toegang tot Netflix kry. Kry dit nou →
