Aaron Mark het The Horror of Dolores Roach rondom 2015 as ’n eenvrou-toneelstuk, Empanada Loca, geskryf. Dit is gegrond op die gelyknamige treffer-podcast.
Die die vertelling verloop soos ’n hedendaagse Sweeney Todd-geïnspireerde verhaal van liefde, verraad, dwelms, kannibalisme (!) en oorlewingsdrang.
Mark, wat ook deel van die TV-verwerking se vervaardigingspan is, het al vertel dat mense gedink het hy is stapelgek toe hy dié storie vir TV aangebied het.
Die storie het sy wortels in Mark se waarnemings van blitsvinnige gentrification in Washington Heights, die Manhanttan-buurt waar hy vir tien jaar gewoon het. Hy het die manier waarop die gemeenskap ditself begin verteer het as ’n vorm van kannibalisme beskou. Hy maak dít toe deel van die storie…
Die storie begin met Dolores Roach (Justina Machado, Six Feet Under en One Day At a Time) wat ná 16 jaar uit die tronk vrygelaat word. As sy dan terugkeer na Washington Heights in Manhattan, New York, kruis sy weer paaie met ’n ou stoner-pel, Luis (Alejandro Hernandez van New Amsterdam). Hy bied vir haar ’n oplossing as sy sukkel om werk te kry. Sy’t mos ’n talent vir die stres uit mense se skouers te vryf, sy kan mos sommer as ’n masseuse in die kelder onder sy klein hole-in-the-wall-eetplek werk, sê Luis. Maar dan gebeur iets wat haar dalk weer terug tronk toe kan stuur. “Magic Hands” Dolores word tot skokkende uiterstes gedryf om te oorleef.
The Horror of Dolores Roach is vanaf 7 Julie 2023 op Prime Video beskikbaar.
