In die komende weke gaan dit allermins windstil wees in Ruiterbosch, die fiktiewe Kaapse woonbuurt waar die kykNET-sepie Suidooster afspeel.
Dié vier storielyne gaan Suidooster se aanhangers vasgekluister voor die kassie hou:
1
Steek daar dalk tog waarheid in die ou spreekwoord dat “ou liefde nooit roes nie”? Alex begin in Ty se slaai krap en die Daniels-egpaar se huweliksbootjie vaar troebel water binne . . . Wanneer Lee-Ann boonop saam met Alex na Mauritius wegglip (al is dit glo net vir “besigheid”), lyk dit asof daar weer ’n flonkering in hul oë is. En dit voorspel niks goed nie.
2
Ook Justin word vasgevang in ’n liefdesdriehoek. Dinge raak betreklik gekompliseerd tussen hom en Veroné wanneer haar verloofde, Jabes, sy opwagting maak.
3
Rhafiek se groot drome vir Atlantic Adrenaline ontaard in ’n nagmerrie ná ’n staptog skeefloop. Rhafiek en die stappers, wat sy ma Mymoena insluit, verkeer in ’n lewensgevaarlike situasie, veral nadat een die stappers ’n besering opdoen.
4
In die skaduwees van Ruiterbosch word wraakplanne gesmee en ’n nuwe gevaarlike alliansie kry gestalte . . . Gary is in Nazeem se kloue vasgevang, en hy word gehiet en gebied om Nazeem se vuilwerk vir hom te doen. Só moet Gary, wie se gewete hom begin pla, vir Nazeem help om Bridgette en JPD tot ’n val te bring.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
