Silo vertel die verhaal van die laaste 10 000 mense op aarde. In dié verbeelde toekoms het die wêreld in duie gestort en die oorlewendes woon in ’n reuse ondergrondse silo. Die wêreld buite die silo is dodelik. Giftig, leer ons. Dié distopia se geheime lê egter so diep verborge soos die honderde vlakke van die silo waar mense “leef” in ’n samelewing met reëls wat hulle glo in hul beste belang is. Maar is al die reëls en regulasies regtig om hulle te beskerm? Niemand weet immers wanneer of hoekom dit gebou is nie en noodlottige gevolge wag op diegene wat te veel vrae vra.
Rebecca Ferguson speel Juliette, ’n ingenieur wat antwoorde soek oor ’n geliefde se dood en dan binne-in ’n maalkolk van leuens en raaisels beland. Ook in die rolverdeling tel onder andere Rashida Jones, Tim Robbins, David Oyelowo.
Die reeks is gegrond op die gelyknamige boeke deur die skrywer Hugh Howey.
Vanaf Vrydag, 5 Mei 2023, op Apple TV+ beskikbaar om te stroom.
