Dié week bring moeilike besluite en meer as een geheim wat dreig om alles te verander. Verhoudings word ook onder druk geplaas, terwyl sommige karakters probeer regmaak waar daar reeds verbrou is. Intussen sorg nuwe gesigte, ou gevoelens en ’n paar ongemaklike waarhede vir nog meer spanning in sepieland.
Lees ons sepievoorskou vir meer oor die drama wat vandeesweek op die kassie uitspeel.
Binnelanders
Johan (Gustav Gerdener) word hierdie week gedwing om ’n harde waarheid te aanvaar, maar ongelukkig het hy niemand anders as homself om te blameer nie. Dit lyk of die mans van Binneland almal besluite neem wat hul verhoudings met hul kinders beïnvloed en Johan se verhouding met sy dogter is ’n goeie voorbeeld.
Tracy (Melinda Viljoen) en Tertius (Reynardt Hugo) sukkel steeds om mekaar te vind. Ek verstaan Tracy se frustrasie, maar dit voel ook of Tertius haar net verder wegstoot met sy optrede. Ironies genoeg lyk dit amper of sy gedrag Tracy terugstoot na ’n bekende verhouding…
Ella (Marlee van der Merwe) gaan intussen voort met haar rugstekery en kykers gaan nie glo wie sy hierdie week gebruik om haar sin te kry nie. Daar is ook ’n nuwe dokter in die gange van Binneland Hospitaal en iets sê vir my hy gaan meer moeilikheid as oplossings bring.
Nuwe episodes van Binnelanders word vanaf Maandag tot Vrydag om 19:30 op kykNET en DStv Stream (DStv-kanaal 144) uitgesaai. Daar is ook elke aand ’n herhaling van die episode om 23:30, asook Dinsdag tot Vrydag om 08:30.
Skemergrond
Christine (Devonecia Swartz) is weer op soek na moeilikheid ná verlede week se ongemaklike ontmoeting met Jasmine (Khadija Heeger). Hierdie keer wil sy ’n geveg wen, maar die groot vraag is of haar besigheid nog ’n oorlog sal oorleef.
Dirk (Wilhelm van der Walt) is terug in Gemoedsdrift met ’n voorstel wat die verhouding tussen sy familie en die Louws gaan toets. Ek verstaan mens wil jou plaas beskerm, maar soms voel dit of die Louws onnodige spanning veroorsaak. Kyk net hoe hang Lily (Hildegardt Whites) se verhouding nou aan ’n draadjie.
Gloria (Hunter Plaatjies) en Kevin (Gershwin Mias) ontdek hierdie week dat geld maklik tussen twee mense kan kom. Ek hoop regtig hulle kry ’n oplossing, want as daar nou een troue is waarvoor ek wag, is dit dié twee se groot dag.
Daar is ook ’n nuwe man in die dorp en Patty (Gretchen Ramsden) lyk behoorlik beïndruk, maar iets omtrent hom laat my ongemaklik voel. Ek hoop net hy breek nie haar hart soos al die ander nie.
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
Diepe Waters
Rossouw (Altus Theart) steek hierdie week ’n bekende gesig uit die verlede weg en iets sê vir my sy familie gaan dit verloor as hulle uitvind wie hy beskerm.
Maar geen reaksie kom naby aan die chaos wat Marco (Xander Venter) en René (Marijke Coetser) beleef ná hul nuus bekend word nie. Nog ’n bekende gesig daag by René se huis op en hul reaksie weerspieël pretty much alles wat Boskruin se gemeenskap tans dink.
Zelda (Sandi Schultz) ontdek uiteindelik waarom dinge die afgelope tyd so skeefloop met haar man en die waarheid slaan haar heeltemal onverwags. Nou staan sy voor een van die moeilikste besluite van haar lewe. Ek weet eerlikwaar nie wat ek in haar situasie sou gedoen het nie.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Suidooster
Lee-Ann (Portia Joel) en Mike (Anrich Herbst) het eenvoudig te veel geheime en onderdrukte gevoelens tussen hulle. Dinge raak ongemaklik en dit voel of niemand meer weet waar hulle met mekaar staan nie.
Angie (Char Carrie) staan ook voor groot besluite en eerlikwaar, sy verdien beter as dit. Nie almal is gelukkig oor Wade (Dean Smith) en Zoë (Lauren Joseph) se verhouding nie, veral nie die mense naaste aan hulle nie, en ek verstaan hoekom. Een keer is erg genoeg, maar om dieselfde fout ’n tweede keer te maak is net te veel. Angie het immers van die begin af gevoel iets is nie reg nie.
Intussen loop dinge voortdurend vir Nazeem (Irvine van der Merwe) verkeerd. Ava (Simone Neethling) begin dan besef dat dinge net glad verloop wanneer Nazeem kry wat hy wil hê. Ek weet nie meer of ek vir hom moet jammer voel, of net hoop hy bly vir ’n slag uit die moeilikheid nie.
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up en DStv Stream.
