Suidooster
Aiden (Theodore Jantjies) sukkel om die geld vir die apteek in die hande te kry en nes hy desperaat word, daag ’n goeie Samaritaan met ’n vet bankrekening op om hom uit sy finansiële penarie te red. Maar Aiden beter lig loop, want soos Sneeuwitjie en Rooikappie sal getuig, nie almal wat onskuldig voorkom, kan vertrou word nie.
Ruiterbosch wemel van die slinkse slange in die gemeenskap en almal weet wie bo aan my lys is. Ek wil letterlik uit my vel uit spring as Orpa (Marisa Drummond) eers vir mense wil seën. Die klimaks bou rondom hierdie storielyn en kykers se monde gaan soos die res van Ruiterbosch oophang as julle sien wat volgende gebeur. Dani (Vashti Prins) is lus vir haar en elke woord wat uit Orpa se mond kom, laat Dani se bloed kook. Orpa beter weet dat hierdie pastoorsvrou niemand se vloerlap is nie. Dani sal die vloer met Orpa vee as sy haar ver genoeg druk.
In die legendariese woorde van 7de Laan se geliefde Hilda, hang arme Rita (Illse Roos) se senuwees aan flenters. Ongelukkig vir Nazeem (Irvine van der Merwe) is sy nie heeltemal ’n pushover nie. Hy loop homself dié week lelik vas as Rita nie haar sin kry nie.
Kyk Suidooster op DStv Online.
Diepe Waters
Tsepho (Johnny Potsanyane), Jacques (Werner Coetser) en Zelda (Sandi Schultz) kry almal ’n reality check as dit by familie kom.
Tsepho besef dat onvoorwaardelike liefde soms teen ’n heftige prys kom. Of dit die moeite werd is, sal hy diep oor moet nadink. Persoonlik is ek op dieselfde blad as Nina (Reze-Tiana Wessels) wanneer dit by hierdie onderwerp kom. Ek gaan niemand betaal om vir my om te gee nie en ek gaan ook nie uitgebuit word sodat jy saam met my sal tyd spandeer nie. As ’n verhouding saam met my nie priceless vir jou is nie, dan weet jy waar die deur is.
Jacques het gedink sy pa se liefde vir hom is groter as die fout wat hy gemaak het. Gys (Justin Strydom) bewys egter vir ons almal verkeerd met ’n move wat kykers ewe erg sal skok as arme Jacques toe die mat onder sy voete uitgeruk is.
Zelda kan jou vyand wees al is sy lief vir jou, maar die Here moet jou siel bewaar as jy jou rug op haar draai. Pam maak hierdie week besluite wat sy glo in haar beste belang is, maar dit kom met gevolge vir die mense in haar binnekring.
Ons almal onthou die pyn van daardie eerste liefdesteleurstelling. Oh, young love! Die pyn voel vir jou erger as enigiets wat jy ooit in jou hele lewe gaan ervaar. Dit voel letterlik asof iets jou in die bors gesteek het. Nou, natuurlik is dit nie waar nie. Daar is veel erger dinge wat ’n mens in die lewe gaan deurmaak, maar Karla (Daniëlle Swanepoel) ervaar dié week daardie eerste teleurstelling met ’n verrassende einde.
Kyk Diepe Waters op Catch Up en DStv Online.
