Daar is nie genoeg plek in die tronk vir al die moeilikheidmakers wat in Arendsvlei rondloop nie. En as iemand nie vinnig iets doen nie, gaan Simone (Dawn Fisher) dié week die volgende jong slagoffer op Derrick (Travis Snyder) se lys word. Hierdie situasie is ’n ticking time bomb! Dit terwyl Arendsvlei se hoof-gangster ná etlike jare opgedaag het om dinge nog verder deurmekaar te krap en ’n angsbevange Karla (Daniélle Swanepoel) haar grootste nagmerrie in Diepe Waters beleef. Rossouw (Altus Theart) beter vinnig ’n werk soek, want Karla se terapie-rekening gaan nie goedkoop wees nie.
Sepies op ons radar vandeesweek is Arendvslei en Diepe Waters.
Diepe Waters
Die skrif is teen die muur en solank Rossouw met sy rug daarteen staan, kan hy dit nie lees nie. Mense dink altyd hulle is slim en kan maklik dinge wegsteek, maar geheime kom altyd uit, veral in sepieland. Dit is deel van die DNS van ’n sepie om geheime te hê, sodat ons op een of ander dramatiese manier kan sien hoe daardie geheim in mense se gesigte ontplof. Soms vat dit jare, maar die waarheid kom altyd uit… En net ’n dwaas sal dink hy kan met ’n sappige geheim wegkom. Anja (Reandi Grey) en Rossouw het vir moeilikheid gesoek toe hulle besluit het om soos tieners in die Swartmarlyne se swembad te gaan vry. Enigiemand kon hulle betrap het, maar ongelukkig vir hulle is dit Karla se hart wat hulle gebreek het.
Nee kyk, ek weet nie wat nou van Karla gaan word nie, maar ek weet ek sou baie terapie nodig gehad het as ek my pa en tannie in mekaar se arms met hul tonge in mekaar se kele gesien het. ’n Mens kon sien hoe Karla se hart net daar agter die pawiljoen in ’n duisend stukke breek. Dit was amper ewe intens soos toe die lewe letterlik Jacques (Werner Coetser) se liggaam vir ’n sekonde verlaat het toe Pam (Tracey Lee Oliver) sy eie geheim in sy oor fluister. Die uitdrukking op sy gesig was priceless. Almal onderskat vir Pam en dink sy stap met haar kop in die wolke. Ek dink nie Jacques sal weer vir haar onderskat nie. Pam has entered her boss bitch era and I’m here for it.
Ek wonder net hoe Pam gaan reageer as sy uiteindelik uitvind wie haar pa is. Ek het mos ’n paar weke gelede voorspel dat Gys (Justin Strydom) seker Pam se pa is, veral toe Zelda (Sandi Schultz) so geheimsinnig was. En daar val ek amper van my stoel af toe Zelda die nuus uitblaker. Pam het beslis ’n koeël ontduik deur nie met Jacques te slaap nie. Verbeel jou dié boetie en sussie het op mekaar verlief geraak! Wel, dit sou nie ’n eerste vir sepies wees nie. Vreemder dinge het al gebeur. As Rossouw se geheim dié week uitkom, beter Meghan (Lea Vivier) vinnig haar verhouding met haar skoonseun stop. Sjoe ’n familie kan net soveel hanteer.
As die Cupido-familie in Arendsvlei gedink het hulle het slegte geluk, kan hulle bly wees hul van is nie Swarts nie.
Kyk Diepe Waters op Catch Up en DStv Online.
Arendsvlei
Vir jare hoor ons net van Desmond Galant (Alistair Izobell), die man met al die mag wat uit Arendsvlei moes vlug weens sy onderduimse werk. En daar daag hy toe verlede week op en verras ons almal. Die sjarmante Alistair Izobell is die laaste persoon wie ek verwag het in die rol. Ek kan nie wag om te sien hoe hy hierdie karakter lewe gee nie. Natuurlik was dit Rachel (Kim Syster) wat hom met ope arms verwelkom het. Ek moes geraai het dat Wengrid haar marionet sou stuur. Wat beplan hierdie siek trio vir die arme inwoners van Arendsvlei? Dit is beslis nie iets goeds nie!
En terwyl die polisie op die evil trio se spoor is, hoop ek hulle vang vir Derrick (Travis Snyder) en gooi die sleutel weg. Elke haar op my arm was penorent toe Derrick vir Simone (Dawn Fisher) in die middel van die nag in die kombuis betrap. Die kyk in sy oë was wild, soos iemand wat heeltemal beheer oor sy liggaam verloor het. Ek weet nie wat in PE gebeur het nie, maar sy lys van slagoffers is seker so lank soos my arm. Sy vrou kan aanvoel dat iets fout is, maar sy weet net nie wat nie. Ek weet nie hoe sy haar kollegas en die kinders in haar klas weer in die oë sal kan kyk as iets met Simone gebeur nie.
Kyk Arendsvlei op DStv Online.
